Dünən futbol üzrə 2012-ci il Avropa çempionatının qrup mərhələsinə start verilib. Polşa və Ukraynanın birgə ev sahibliyi edəcəyi qitə çempionatının finalına vəsiqə uğrunda Azərbaycan milli komandası da mübarizə aparır. Yığmamız Almaniya, Belçika, Türkiyə və Qazaxıstan milli komandaları ilə "A" qrupunda yarışır. Alman mütəxəssis Berti Foqtsun başçılıq etdiyi millimiz ilk oyununu səfərdə - sentyabrın 7-də Almaniya yığmasına qarşı keçirəcək. Xatırladaq ki, bu matç 2010-cu il dünya çempionatının bürünc medallarını qazanan Almaniya millisinin doğma publika önündə ilk oyunu olacaq.
"Avro-2012"nin seçmə mərhələsində millimizin yer aldığı A qrupunda ilk oyunlar isə dünən gecə saatlarında keçirilib. Astana şəhərindəki "Astana Arena"da Qazaxıstan yığması Türkiyə millisini qəbul edib. Brüssel şəhərindəki "Rua Boduen" stadionunda isə Belçika-Almaniya oyunu baş tutub.
Millimiz isə "Avro-2012"nin seçmə mərhələsində ilk matçını sentyabrın 7-də Bakı vaxtı ilə 23:45-də, Köln şəhərindəki "Raynenerjiştaudium"da Almaniya millisinə qarşı keçirəcək. Yarışın qaydalarına görə, qrupda birinci yeri tutan 8 komanda qitə çempionatının final mərhələsinə birbaşa vəsiqə qazanacaq. İkinci yerin sahibləri isə pley-off matçlarında bəxtlərini sınayacaqlar.
Qeyd edək ki, millimiz Almaniya ilə oyuna böyük hesablı qələbə ilə çıxacaq. Belə ki, Almaniyada təlim-məşq toplantısında olan yığmamız bu ölkənin komandası ilə rəsmi oyun ərəfəsində yoldaşlıq görüşündə qüvvəsini sınayıb. Futbolçularımız həvəskarlardan ibarət "SV Rust" klubu ilə qarşılaşıb. Yığmamız zəif rəqibini böyük hesabla məğlub edib. 4:0 hesablı qələbədə Vaqif Cavadov dubl edib, Araz Abdullayevlə Fabio Luis Ramim isə hərəyə bir qol vurublar.
Qeyd edək ki, yığmamızın ilk rəqibi Almaniya yığması iki ay əvvəl başa çatmış dünya çempionatının bürünc medalını qazanıb. Elə bu səbəbdən də Almaniya millisi "A" qrupunun favoriti hesab olunur. Amma bu komandanın baş məşqçisi Yoahim Löv belə hesab etmir. O, Almaniya mətbuatına verdiyi açıqlamasında deyib:
"Bizi qrupun lideri hesab edirlər. Ona görə ki, son dünya çempionatında yaxşı çıxış etdik. Futbolçular üzərilərinə düşən məsuliyyəti yaxşı dərk etməlidirlər. Qarşıdakı matçlara lazımınca köklənmək lazımdır". Almanların baş məşqçisi Belçika və Azərbaycanla oyunlarda maksimum nəticə qazanmağın vacib olduğunu vurğulayıb: "İki oyunda 6 xal qazanmalıyıq. Rəqiblərə yuxarıdan aşağı baxmır və hörmətlə yanaşırıq".
Almaniya - Azərbaycan oyunundan bir gün əvvəl - sentyabrın 6-da, yerli vaxtla saat 11:00-da, Köln şəhərindəki "Holidey İnn" otelində Azərbaycan milli komandasının baş məşqçisi Berti Foqtsun mətbuat konfransı keçiriləcək. Millimizin mətbuat üçün açıq məşqi isə sentyabrın 5-də, yerli vaxtla saat 17:00-da, matçın keçiriləcəyi "Raynenerjiştadium"da olacaq.
Almaniya - Azərbaycan matçına millimizin futbolçuları yeni formalarda çıxacaqlar. Müasir dizayn və yüksək keyfiyyəti ilə seçilən bu formalar İngiltərənin "Umbro" firması tərəfindən istehsal olunub.
|
