Unibank Premyer Liqasında IV turun oyunlarından sonra çempionatda fasilə yaranıb. Bu fasilə 2012-ci il futbol üzrə Avropa çempionatının seçmə qrup oyunlarının keçirilməsi ilə əlaqədardır. Qeyd edək ki, bu turun heç də bütün oyunları baş tutmadı. Belə ki, Avropa Liqasının oyunlarına görə "Qarabağ" - "Bakı" oyunu təxirə salınmışdı. Qalan beş qarşılaşma isə baş tutdu.
Sözsüz, 4-cü turda bütün diqqət "Şəfa" stadionunda keçirilən "İnter" - "Neftçi" matçına yönəlmişdi. Turun mərkəzi oyunu sayılan bu matçda çempionluq iddiasında olan hər iki komandanın şanslarına aydınlıq gələcəkdi. Qarşılaşma həmçinin "Neftçi"nin gənc baş məşqçisi Arif Əsədov üçün ciddi imtahan idi. Onun mövsümün ilk sınağından necə çıxacağı hamıda maraq doğururdu. Oyun "Neftçi"də vəziyyətin ürəkaçan səviyyədə olduğunu göstərdi. Ən azından flaqman rəqibindən üstün futbol oynadı və bir çox komponentlərdə "İnter"i bir baş üstələdi. Bu da "Neftçi"nin belə davam edəcəyi təqdirdə, məqsədinə çatacağını proqnozlaşdırmağa əsas verir. Dörd turdan sonra 10 xal toplayan "Neftçi" hazırda turnir cədvəlinin birinci pilləsindədir. Klubun hücumçusu Bahodır Nəsimov isə 5 topla çemionatın ən sərrast futbolçusudur.
Turun ikinci əsas qarşılaşması da "Şəfa"da keçirildi. İlk üç turda 7 xal qazanmış AZAL-la "Xəzər-Lənkəran" üz-üzə gəldi. Matç AZAL-ın mövsüm ərzində ilk ciddi sınağı olduğundan onların real gücünə məhz bu oyunda qiymət veriləcəkdi. Qarşılaşma göstərdi ki, Nazim Süleymanovun komandası mövsümün sürprizi hesab olunsa da, çətin ki, mükafatçılar sırasına düşsün.
"Qəbələ" isə yenə qələbə qazana bilmədi. Ölkəmizə böyük ümidlərlə gətirilən məşhur ingiltərəli Toni Adams 10 təcrübəsiz azərbaycanlı və 1 legionerin yer aldığı MOİK-lə bacarmadı. İlk üç turda məğlubiyyət acısı dadan Qəbələ təmsilçisi bu dəfə aktivinə bir xal yazdırsa da, göstərdiyi oyun ümidverici deyil.
Turun digər üç oyunu Premyer Liqanın autsayderləri hesab olunan komandalar arasında keçirildi. Belə ki, "Muğan" Salyanda "Gəncə"ni, "Simurğ" isə Zaqatalada "Turan"ı qəbul etdi. Bu komandaların Premyer Liqada qalmaq uğrunda mübarizə aparacaqlarını nəzərə alsaq, qeydə alınan heç-heçələri gözlənilən nəticə hesab etmək olar.
Premyer Liqa, IV tur: "Muğan" - "Gəncə" - 1:1, "Simurğ" - Turan" - 2:2, "İnter" - "Neftçi" - 0:2, "Qəbələ" - MOİK - 0:0, AZAL - "Xəzər-Lənkəran" - 0:1.
Beşinci turun oyunları sentyabrın 11-də və 12-də keçiriləcək.
|
