"Ermənistan kifayət qədər çətin vəziyyətdə olduğundan bu anlaşmaya imza atıb". Bu sözləri beynəlxalq sülh naminə Karnegi Fondunun baş elmi əməkdaşı, Qarabağ münaqişəsinə həsr olunmuş "Qara bağ" kitabının müəllifi Tomas de Vaal "Azadlıq" radiostansiyasına bu yaxınlarda imzalanan Ermənistan - Rusiya hərbi protokolunu şərh edərkən deyib.
Onun sözlərinə görə, Serj Sarkisyan Ermənistan - Türkiyə münasibətlərinin normallaşmasına böyük ümidlər bəsləmişdi, bu işə o böyük siyasi kapital yatırmışdı, lakin proses, məlum olduğu kimi, öz həllini tapa bilmədi.
Dağlıq Qarabağ münaqişəsinə toxunan Karnegi Fondunun baş elmi əməkdaşı bu münaqişənin dalana dirəndiyini deyib:
"Bununla bağlı Azərbaycan səs-küy salır. Məhz buna görə də Rusiya imkandan istifadə etdi və Ermənistana bu təklifi irəli sürdü. Pulu olmayan, iqtisadiyyatı gərgin vəziyyətdə olan və hərbi sursatlar almaq üçün lazımi vəsaitə malik olmayan Ermənistan ucuz təhlükəsizliyə razılıq verdi".
Ekspert Rusiyanın bu regionda iqtisadi maraqlarının olduğunu hesab edir.
"Rusiyanın Ermənistan iqtisadiyyatında payının olması olduqca mühüm məsələdir. Ümumilikdə Rusiya Azərbaycanla ciddi və real siyasi əlaqələrdə olan Gürcüstanı itirib. Hətta Ermənistanın çox sayda tərəfdaşları var. Belə ki, İrəvan NATO proqramlarında iştirak edir, ABŞ və Avropa Birliyi ilə yaxşı münasibətlərə malikdir. Bir sözlə, xarici siyasət sferasında xeyli sayda tərəfdaşları var və hər şeyini Rusiyaya vermək niyyətində deyil", - deyə Tomas de Vaal qeyd edib.
|
