Yay mövsümü ərzində gözdən uzaq gəzib, efirlərdə görünməyən NEXT qrupunun yeni layihə üzərində çalışdığı məlum olub. Bu barədə "Ayna" qəzetinə qrupun mətbuat xidmətindən məlumat verilib. Xəbərdə qeyd olunur ki, qrup sentyabr ayından etibarən hələ ki sirr saxladıqları layihələri davamlı olaraq geniş kütləyə təqdim edəcək.
Bildirək ki, NEXT ilk olaraq "Love for sale" albomundan "Dans et" mahnısına çəkilən klipi seyrçilərin ixtiyarına verəcək. Hazırda çəkiliş prosesi gedən "Dans et" mahnısının musiqisi Aybəniz Güllərə, sözləri isə Güllər xanıma aiddir. Etno-pop janrında olan musiqidə nağara, saz alətləri elementlərindən də istifadə olunub.
Onu da qeyd edək ki, klipin beynəlxalq standartlara uyğunluğu üçün xaricdən yaradıcı qrup və texniki avadanlıqlar gətirilib. Azərbaycanda bahalı kliplərdən sayılacaq bu ekran işində 4 oğlanla yanaşı, tanınmış xanımlar iştirak ediblər. Sözügedən xanımların kimliyinə gəlincə, NEXT-in mətbuat xidməti bu barədə açıqlama verməyərək, hələlik sirr saxladıqlarını bildirdi:
"Bu xanımlardan heç biri hələ heç bir müğənninin klipinə çəkilməyib. Ona görə yox ki, onlara belə bir dəvət gəlməyib. Sadəcə olaraq, onlar hər yaradıcı təklifi dəyərləndirməyiblər".
|
