Ali məktəbə tələbə qəbulu adı ilə dələduzluqda təqsirləndirilən Firdövsi Məmmədovun məhkəməsi başladı. Prosesin əvvəlində prokuror ittiham aktını elan etdi.
İttihamdan məlum oldu ki, təqsirləndirilən Firdövsi Məmmədov Ceyhun Məmmədov adlı şəxsin qızını ali məktəbə düzəltmək adı ilə aldadaraq ondan 17 min manat alıb. Ceyhun Məmmədovun şikayəti əsasında Firdövsi Məmmədov polis tərəfindən yaxalanmışdır.
Məhkəmə prosesində ifadə verən Ceyhun Məmmədov bildirdi ki, təqsirləndirilən şəxsi Xətai rayonunda yaşayan orta məktəb direktoru Ulduzxan adlı şəxsin vasitəsi ilə tanıyıb. Onun sözlərinə görə, Ulduzxan adlı şəxs Firdövsi Məmmədovun təmiz adam olduğu barədə "xarakteristika" verib:
"Ulduzxan mənə dedi ki, Firdövsi iş düzəldən adamdır və ona etibar etmək olar. Mən də onun vasitəsi ilə Firdövsi Məmmədovla Nərimanov rayon Polis İdarəsinin yaxınlığında görüşdüm və ona qızımı ali məktəbə düzəltdirmək istədiyimi bildirdim. O da problem olmadığını və bu işlərə əli keçdiyini qeyd edərək, qızımı ali məktəblərdən birinə düzəldəcəyinə söz verdi. Bunun üçün də məndən 17 min manat aldı. Lakin sonradan vaxt keçsə də, vədinə əməl etmədi. Sonra isə onu, ümumiyyətlə, tapmaq mümkün olmadı. Buna görə də polisə şikayət etməyə məcbur oldum".
Prokurorun suallarını cavablandıran zərərçəkmiş bildirdi ki, Firdövsi Məmmədov Tələbə Qəbulu üzrə Dövlət Komissiyasında işləyən vəzifəli şəxsin əli ilə iş görəcəyini deyirmiş. O, ifadəsinin sonunda zərər çəkdiyini və pulunun geri qaytarılmasını tələb etdiyini bildirdi.
Məhkəmədə ifadə verən Firdövsi Məmmədov zərərçəkmişdən 17 min manat aldığını etiraf edərək bildirdi ki, həmin pulu alsa da, vədinə əməl etməyib: "Həmin pulu da xərcləmişəm. İndi zərərçəkmişə dəymiş ziyanın ödənilməsinə hazıram".
Məhkəmə prosesi sentyabrın 3-də davam etdiriləcək.
|
