NATO-nun Gürcüstan və Azərbaycan vasitəsilə Əfqanıstana göndərilən yüklərinin həcmində artım gözlənilir. Bu barədə APA-ya Azərbaycan Nəqliyyat Nazirliyindən məlumat verilib.
Yüklərin həcminin artma səbəbləri İraqdan çıxarılan hərbi birləşmələrin əmlakının bir hissəsinin və qeyri-hərbi təyinatlı avadanlıqların Əfqanıstana göndərilməsidir. Bu yüklər Türkiyə üzərindən konteynerlər vasitəsilə Gürcüstana, oradan isə Azərbaycana və Xəzər dənizi üzərindən Türkmənistandan keçməklə Əfqanıstana ötürüləcək.
Nazirlikdən bildirilib ki, hazırda Avropa ölkələrinin Əfqanıstana göndərdiyi humanitar yüklərin həcmində artım nəzərə çarpır. Belə ki, cari ilin yanvar-iyun aylarında Avropa ölkələrindən TRACECA dəhlizi vasitəsilə Azərbaycan üzərindən Əfqanıstana 190,4 min ton yük göndərilib. Bunun da böyük hissəsini dərman ləvazimatları, hərbçilər üçün müəyyən əşyalar, qeyri-hərbi təchizat vasitələri təşkil edib.
TRACECA Hökumətlərarası Komissiyasının Azərbaycan Milli Katibliyinin rəhbəri Akif Mustafayev isə APA-ya açıqlamasında Azərbaycan üzərindən Əfqanıstana hər ay NATO ölkələrinə məxsus 1500 konteynerin yola salındığını söyləyib. TRACECA dəhlizinin Azərbaycan üzərindən keçən mərkəzi hissəsinə NATO-nun böyük önəm verdiyini vurğulayan A. Mustafayevin sözlərinə görə, yüklərin ötürülməsi razılaşmalar əsasında həyata keçirilir.
|
