Sentyabrın 7-9-da Bakıda "Azərbaycanda söz və ifadə azadlığına ictimai dəstək" Forumu keçiriləcək. "Turan"ın məlumatına görə, forumda məqsəd ölkədə söz və ifadə azadlığı ilə əlaqədar problemlərin müzakirəsidir. Çoxplanlı aksiya olaraq, forum vətəndaş cəmiyyətinin bu istiqamətdə səylərinin dəstəklənməsi, hökumət və digər sektorlarla dialoq, əməkdaşlıq üçün platforma yaradılmasına çalışır.
Forum Azərbaycanda tanınmış ictimai və media təşkilatlarının təşəbbüsü ilə keçirilir. Forumu Avrointeqrasiya Milli Komitəsi, "Yeni Nəsil" Jurnalistlər Birliyi, İfadə Azadlığı Komitəsi, "Azərbaycan Naminə" İctimai Forumu, Azərbaycan Jurnalistlər Birliyi, Açıq Cəmiyyət İnstitutu - Yardım Fondu və "Turan" İnformasiya Agentliyi təşkil edir.
Forumun ilk iki günündə söz və fikir azadlığına həsr olunmuş kitab, foto və karikatura sərgisi keçiriləcək. Digər tədbirlər, o cümlədən "Frontlayn" (ön xətt) jurnalist diskussiya klubunun açılışı olacaq. Tədbirin son günündə beynəlxalq konfrans var. Konfransda tanınmış xarici və yerli ekspertlər, jurnalistlər, ictimai xadimlər, dövlət orqanlarının nümayəndələri və bir sıra iri beynəlxalq təşkilatların rəhbərləri iştirak edəcəklər.
Forum Azərbaycanda söz və ifadə azadlığının inkişafındakı xidmətlərə görə xüsusi mükafatın təqdim olunması ilə başa çatacaq. Laureatı əvvəllər məhkəmə çəkişmələrinə məruz qalmış və peşə fəaliyyəti ilə əlaqədar cinayət məsuliyyətinə cəlb olunmuş jurnalistlər seçəcəklər.
Konfransda Forumun qətnaməsinin, ictimaiyyət və dövlət qurumları üçün fikir azadlığının inkişafına dair təkliflər və tövsiyələr paketinin qəbulu gözlənilir.
|
