Dünən Bakı Apellyasiya Məhkəməsi "STİM" MMC-nin kommersiya direktoru Süleyman Abbasov barəsində Səbayel Rayon Məhkəməsinin seçdiyi həbs qətimkan tədbirini dəyişmədən qüvvədə saxlayıb.
Məhkəmə öz qərarını Süleyman Abbasovun ƏN Penitensiar Xidmətinin tibb müəssisəsində müalicə olunması ilə izah edib. Bu barədə "Turan"a Süleyman Abbasovun vəkili Elmar Süleymanov məlumat verib.
Vəkilin sözlərinə görə, S.Abbasovun 58 yaşı var və ürəyin işemik xəstəliyi, gərginlik stenokardiyası, bronxial astma və digər xəstəliklərdən əziyyət çəkir. İyulun 2-də Səbayel Rayon Məhkəməsi S.Abbasovun barəsində həbs qətimkan tədbiri seçib. "Bakı İstintaq Təcridxanasında onun səhhəti pisləşib. Oradan Ədliyyə Nazirliyinin Penitensiar Xidmətinin müalicə müəssisəsinə köçürülüb. Müalicəyə baxmayaraq, səhhətində müsbət dinamika müşahidə edilmir. Əksinə, ağırlaşma halları artır. Səhiyyə Nazirliyinin ekspertizasının rəyinə əsasən, S.Abbasovun həbsxana şəraitində saxlanması məqsədə müvafiq deyil. Amma bu rəyə baxmayaraq, məhkəmə yenə də həbs qətimkan tədbirini qüvvədə saxladı", - deyə o qeyd edib.
Rusiya vətəndaşı Süleyman Abbasov "STİM" MMC tərəfindən "Bank OF Azerbaijan"dan alınmış 100 min manat kreditin təyinatı üzrə xərclənməməsində təqsirləndirilir. Krediti şirkət götürüb və S.Abbasov STİM-də kommersiya direktoru işləyib. O, CM-in 178-ci (dələduzluq), 313-cü (vəzifə saxtakarlığı) maddələri ilə təqsirləndirilir.
Vəkil qətimkan tədbirini ev dustaqlığı ilə dəyişdirməsi ilə bağlı Apellyasiya Məhkəməsinə müraciət edibmiş. İndi isə Apellyasiya Məhkəməsinin qərarını Səbayel Məhkəməsinin ittihamyönlü qərarının davamı kimi qiymətləndirir.
Məhkəməyə media mənsubları və Rusiya səfirliyinin nümayəndəsi buraxılmayıb.
|
