On bir ildir Moskva Tehrana Buşəhr Atom Elektrik Stansiyasını istismara verəcəyi ilə bağlı vədlər verir. Məsələ ilə bağlı İran XİN sözçüsü Ramin Mehmanpərəst açıqlama verib. Onun sözlərinə görə, hazırda AES-də planlaşdırılmış son yoxlama işləri aparılır. Nazirlik təmsilçisi deyib ki, elektrik stansiyası tam fəaliyyətə başlayandan bir neçə ay sonra yanacaq əldə ediləcək.
Rusiya mənbələri isə bildirib ki, Buşəhr AES gələn həftənin əvvəlində işə düşə bilər. Avqustun 21-də gözlənilən təntənəli tədbirə Rusiya atom enerji təşkilatının başçısı Sergey Kiriyenko və RF energetika naziri Sergey Şmatkonun da qatılacağı deyilir.
İran parlamentinin milli təhlükəsizlik və xarici işlər üzrə komitəsinin sədri Əlaəddin Brücerdi bildirir ki, İslam Respublikası alimləri tərəfindən hazırlanmış layihəyə əsasən, ilk Atom Elektrik Stanisiyasının tikintisinə başlayacaqlar (İSNA). Açıqlamaya görə, komitə sədri Tehranın Fransa, Almaniya və ABŞ-ı AES-lə bağlı gələcək layihələrdə iştiraka dəvət etdiyini söyləyib. Brücerdi onu da bildirir ki, yeni AES Dərhovində inşa ediləcək.
Parlament təmsilçisinin sözlərinə əsasən, İran Qərb dövlətlərinin nüvə yanacağı mübadiləsi ilə bağlı vədlərinə inanmır. Odur ki, uranı zənginləşdirmək istiqamətində işlərini davam etdirəcək. Ə.Brücerdi deyib ki, Qərb dövlətləri, o cümlədən Fransa, Almaniya və ABŞ "öhdəlikləri dəfələrlə pozub, onlara etimad krediti bitib".
Onun sözlərinə görə, Rusiya Buşəhr AES üçün yanacaq verdiyinə görə etibar qazanıb: "Mən Moskvanı İslam Respublikası qarşısında götürdüyü bütün öhdəliklərə əməl etməyə çağırıram".
İran atom enerji təşkilatının başçısı Əliəkbər Salehi uranı zənginləşdirən yeni zavodun tikintisinə 2011-ci ilin martından başlanacağını xəbər verir.
Arayış: 1975-ci ildə Almaniyanın "Simens" şirkəti bu stansiyanın tikintisinə başlayıb. Ancaq 1979-cu ilin fevral inqilabından sonra inşaat işləri dayandırılıb. Min meqavat gücündə olacaq AES-də yarımçıq qalmış işləri 1995-ci ildən Rusiya mütəxəssisləri davam etdirir. Moskva vəd vermişdi ki, stansiyanı 1999-cu ildə təhvil verəcək. 2009-cu ilin yanvarında Rusiya tərəfi nüvə yanacağının tədarükünü dayandırıb.
Bir müddət öncə Sergey Kiriyenko bildirmişdi ki, Buşəhr stansiyasında işlər tezliklə başa çatacaq və cari ilin avqustunda istismara veriləcək. Baş nazir Vladimir Putin isə bu ilin martında demişdi ki, müəssisənin birinci bloku 2010-cu ilin yayında işə düşəcək. "Atomstroyeksport" rəisi Vladimir Pavlov onda AES-in 2010-cu ilin iyulunda istismar veriləcəyini söyləmişdi.
|
