Dünən Klassik Xalq Cəbhəsi Partiyasının (KXCP) qərargahında Müsavat Partiyası ilə Demokratiya Uğrunda İttifaq (DUİ) növbəti dəfə müzakirələr keçirib. Bu barədə APA-ya DUİ-yə daxil olan Azadlıq Partiyasının sədri Əhməd Oruc məlumat verib.
Onun sözlərinə görə, məsləhətləşmələrdə Müsavat Partiyası ilə DUİ arasında indiyə qədər və bundan sonrakı əməkdaşlıq məsələləri müzakirə olunub. Hər iki tərəf indiyə qədər üzərlərinə götürdükləri öhdəliklərə sadiq olacaqlarını bildirib. Razılığa gəlinib ki, seçki zamanı Müsavat Partiyası DUİ-nin 7, DUİ isə Müsavat Partiyasının 12 namizədini dəstəkləsin. Həmçinin seçki prosesi zamanı digər formalarda əməkdaşlıq da nəzərdə tutulur.
Ə.Oruc Müsavat Partiyası ilə DUİ-nin ilkin olaraq razılığa gəldiyi şəxslərin adlarını da açıqlayıb. Bunlar DUİ-dən Mirmahmud Mirəlioğlu (KXCP sədri), Pənah Hüseyn (DUİ Sədrlər Şurasının üzvü, millət vəkili), Qiyas Sadıxov (Xalq Partiyasının sədri), Elşad Musayev (Böyük Azərbaycan Partiyasının sədri), Əhməd Oruc (Azadlıq Partiyasının sədri), Bəybala Əbil (KXCP sədrinin müavini), İlqar Səidoğlu (KXCP üzvü).
DUİ-nin Müsavat Partiyasının namizədi olaraq dəstəkləyəcəyi şəxslər isə bunlardır: İsa Qəmbər (Müsavat Partiyasının sədri), Vurğun Əyyub (partiyanın Divan üzvü), Sülhəddin Əkbər (Ali Məclisin sədri), Mehman Cavadoğlu (sədr müavini), Hikmət Hacızadə (partiyanın Məclis üzvü), Tofiq Yaqublu (partiyanın sədr müavini), Arzu Səmədbəyli (partiyanın sədr müavini, "Müsavat" deputat qrupunun üzvü), Nəsib Nəsibli ("Müsavat" deputat qrupunun üzvü), İkram İsrafil ("Müsavat" deputat qrupunun üzvü), İltizam Əkbərli ("Müsavat" deputat qrupunun üzvü), Rauf Arifoğlu (partiya üzvü, "Yeni Müsavat" qəzetinin sahibi və baş redaktoru) və Adil Qeybulla (partiyanın Divan üzvü).
Ə.Oruc bildirib ki, Müsavat Partiyası ilə DUİ-nin seçkidə əməkdaşlığı ilə bağlı sənəd hazırlanaraq yaxın günlərdə yayılacaq. Məsləhətləşmələr zamanı AXCP-Müsavat Partiyası münasibətləri də müzakirə olunub.
Bu arada AXCP və Müsavat Partiyasının rəhbərliyi arasında növbəti görüş vaxtı da bəlli olub. Növbəti görüş avqustun 21-də keçiriləcək. Bu barədə APA-ya Müsavat Partiyası Mərkəzi İcra Aparatının rəhbəri Arif Hacılı məlumat verib.
Görüşün Müsavat Partiyasının qərargahında keçirilməsi nəzərdə tutulub. A. Hacılı qeyd edib ki, Müsavat Partiyası özü üçün prioritet sayılan bir sıra dairələri müəyyənləşdirib. Görüş zamanı həmin dairələrlə bağlı müzakirələr aparılacaq.
Görüşdə Müsavat Partiyasının başqanı İsa Qəmbər, partiyanın Mərkəzi İcra Aparatının rəhbəri Arif Hacılı, AXCP sədri Əli Kərimli, AXCP sədrinin müavini Fuad Qəhrəmanlı iştirak edəcək.
Qeyd edək ki, indiyədək Müsavat Partiyası ilə AXCP 70 seçki dairəsində vahid namizəd irəli sürməklə bağlı razılığa gəlib.
|
