Bu gün və sabah Unibank Premyer Liqasında III turun oyunlarıdır. Turun əsas qarşılaşması Lənkəranda keçiriləcək. Yerli "Xəzər-Lənkəran" Bakı "İnter"ini qəbul edəcək. Qeyd edək ki, bu komandalar ilk iki turda qələbə qazanıblar.
Digər matçlarda görüşəcəklər: "Neftçi" - "Simurq", "Xəzər-Lənkəran" - "İnter", "Gəncə" - AZAL, MOİK - "Qarabağ", "Turan" - "Muğan" və "Bakı" - "Qəbələ".
Premyer Liqanın ikinci turu ilk turda olduğu kimi, sensasiya ilə yadda qaldı. Turun gözlənilməz nəticəsi Salyanda qeydə alınıb. Yenə də çempionluğa bir nömrəli namizəd olan "Bakı" ardıcıl ikinci məğlubiyyətdən canını qurtara bilməyib. İlk turda AZAL-a uduzan paytaxtın eyniadlı təmsilçisi bu dəfə "Muğan"a təslim olub. Halbuki "Muğan" birinci turda çempionatın ən zəif komandası hesab olunan MOİK-ə məğlub olmuşdu. İlk turda "Qarabağ"la heç-heçə oynayan və göstərdiyi zəif oyunla medianın tənqidinə tuş gələn "Neftçi" bu dəfə qələbə qazanıb. Nazim Süleymanovun başçılıq etdiyi AZAL isə ardıcıl ikinci qələbəsini qazanıb. İlk turda "Muğan"ı məğlub edən MOİK ikinci turda çempion "İnter"ə düz 89 dəqiqə müqavimət göstərib. Elitaya yenicə vəsiqə qazanan ordu klubu son dəqiqələrdə qapısına təyin edilən penalti zərbəsinin sayəsində uduzdu. Qeyd edək ki, bu turun "Qarabağ" - "Gəncə" oyunu Avoropa Liqasının oyunlarına görə təxirə salınmışdı.
|
