Kişi basketbolçulardan ibarət Azərbaycan yığma komandası Avropa çempionatının final mərhələsinə vəsiqə uğrunda yarışa başlayıb. Qocaman mütəxəssis Elxan Əliyevin başçılıq etdiyi yığmamız qitə çempionatının B divizionunda mübarizə aparır. Qrup mərhələsində Azərbaycan yığması ilə yanaşı, İsveç, Albaniya, Rumıniya və Belarus basketbolçuları da çıxış edirlər.

İlk turda Albaniya yığması ilə qarşılaşan Azərbaycan komandası səfərdə qələbə qazanıb. Elxan Əliyevin komandası rəqiblərini 81:63 (17:19, 31:14, 16:17, 17:13) hesabı ilə məğlub edib. Komandamızın heyətində ən çox xal qazanan Çarlz Devis olub. Milliləşdirilmiş amerikalı legionerimiz yığmamıza 23 xal qazandırıb.

Yığmamız növbəti oyununu avqustun 14-də, Bakıda Belarus yığmasına qarşı keçirib. Millimiz "Sərhədçi" Olimpiya Mərkəzindəki görüşdə qitə birinciliyində ikinci qələbəsini qazanıb - 83:79 (32:20, 15:17, 18:13, 18:29).

Yığmamız növbəti oyununu bir neçə gün əvvəl səfərdə Rumıniyaya qarşı keçirib, üçüncü görüşü də qələbə ilə başa vurub. İlk dəqiqələrdən üstünlüyü ələ alan yığmamız sona kimi hesabda irəlidə olub və 101:86 (24:16, 23:29, 23:18, 31:23) hesabı ilə qalib gəlib.

Bu oyunda komandamızın ən məhsuldar basketbolçusu Rasim Başak olub. Türkiyə superliqasında çıxış edən həmyerlimiz rumınlarla görüşdə yığmanın aktivinə 28 xal yazıb.

Qeyd edək ki, milli yığma komandamız bu yarışda 16 basketbolçunun xidmətindən istifadə edir: Tahir Baxşiyev, Ruslan Qafurov, Zaur Qulanov, Anar Hacıyev, Amil Həmzəyev, Aleksey Kitayev, Emil Mirzəyev, Kamal Muradov, Rasim Başak, (Ruslan Benqer), Çarlz Devis, Spenser Nelson, Aleksandr Rındin, Anar Sarıyev, Aleksandr Slojenitsın, Zaur Paşayev və Fuad Niftəliyev.

III turdan sonra turnir cədvəlinə Azərbaycan yığması başçılıq edir. Komandamızın aktivində 6 xalı var. İsveç və Rumıniya basketbolçuları Elxan Əliyevin yetirmələrindən 1 xal az toplayıblar. Son pillələrdə isə 4 xalla Belarus və Albaniya yığmaları yer alıblar.

Qeyd edək ki, Avropa çempionatının B divizionunda 10 il sonra qələbə qazanan milli komandamız uğurlu seriyanı davam etdirməyə çalışacaq. Komandamızın növbəti və ən ciddi rəqibi İsveç yığmasıdır. Oyun bu gün "Sərhədçi" Olimpiya İdman kompleksində keçiriləcək. Yığma bu oyunda da qələbə qazansa, ilk dövrəni vahid lider kimi başa vura bilər.