Müasir Azərbaycan teatrı çoxsaylı problemlərlə üzləşib. Bina, aktyor və səhnə atributları sarıdan çətinlik çəkən teatrlar səhnələşdirmək üçün reallığa cavab verən əsər axtarışına çıxıb. Maddi marağı təmin olunmayan yaradıcı insanlar isə başqa sahədə özlərini sınamağa üstünlük verirlər. Aktyorların əksəriyyəti teatrda səhnələşdirmək üçün bugünkü reallığa uyğun əsərlərin yoxluğunu dövrün vacib problemi kimi önə çəkir.
Lakin həmkarlarından fərqli olaraq xalq artisti Yaşar Nuri radio və televiziyalardakı bədii əsərlərin say azlığından şikayət etdi:
"Ötən illərdə teatrdan çox kinoda müəyyən problemlər mövcud idi ki, artıq bunların müəyyən qismi müsbət həllini tapır. İndi radio və telekanallarda bədii əsərlərin sayı azalıb. Sovet dövründə belə idi ki, aktyorlar bu sahədə də çalışır, yazarlarla bir araya gəlib meydana dəyərli məhsul çıxara bilirdilər. Lakin bu gün yazarlara ödənilən qonorar kifayət etmədiyindən onlar səhnə əsəri yazmaqdan imtina ediblər. Hazırda teatrların problemləri daha çox bu məsələ ilə bağlıdır".
Məlumatlara görə, son zamanlar teatrlara gələn aktyorların səviyyəsi arzuolunan səviyyədə deyil. Bu fikirlə razılaşan Y.Nuri hesab edir ki, onların arasında yaxşıları da var. Ancaq "30 ilin aktyorunun maddi vəziyyətinə baxanda onların da həvəsi ölür". Həmsöhbətim deyir:
"Bir var yolçuya baxıb yolçuluğu öyrənəsən, bir də var alimə baxıb alimlik etmək istəyəsən. Gərək bu sahədə çalışanların maddi vəziyyəti yaxşı olsun ki, gənclərdə də həvəs yaransın".
"Teatr və teatr fəaliyyəti haqqında" qanunun qəbulundan sonra bu sahədəki problemlərin həll olunub-olunmayacağı məsələsinə gəlincə, Yaşar Nuri qeyd etdi ki, öncə teatr sahəsində yaranan münasibətləri tənzimləyən qanun qəbul etməklə bir sıra problemləri yoluna qoymaq olar. Lakin qanunu qəbul etməzdən öncə geniş ictimai müzakirələr aparılmalıdır.
Aktyorun fikrincə, qanuna elə maddələr salınmalıdır ki, sonradan heç bir problem yaranmasın və qanunun işləkliyi təmin edilsin. Qanunda gənc aktyorlara qayğı, onların sosial müdafiəsini təmin edən müddəalar əksini tapmalıdır:
"Hesab edirəm ki, mədəniyyət və turizm naziri Əbülfəs Qarayev Gənclər və İdman Nazirliyindən gəldiyindən gənclərin problemini kifayət qədər bilir".
Teatrdakı böhranlı günlərin uzun sürdüyünü iddia edən həmkarlarının fikrini birmənalı qəbul etməyən aktyor "böhran cəmiyyətin bütün sahələrini əhatə edə bilər" dedi. İstənilən sahənin inkişafı üçün əsas şərt maddiyyatdır. Əgər aktyora yaxşı pul verilməsə, ondan yalnız ilk aylarda yaxşı aktyor oyunu tələb etmək olar: "Sonra o, həvəsdən düşüb yalnız səhnədə oynamaq xatirinə qalacaq".
|
