Ədalət Partiyasının sədri İlyas İsmayılovun Rusiyada həbsdə olan oğlu Etimad İsmayılovun cinayət işi üzrə məhkəmə prosesi avqustun 24-də davam etdiriləcək. Bu barədə APA-ya İlyas İsmayılov məlumat verib. Millət vəkilinin sözlərinə görə, proses hakim xəstələndiyindən bir müddət təxirə salınıb:

"Lakin bu, bəhanədir. Etimadın vəziyyəti yaxşıdır. Saxlanma yeri ilə bağlı da problemi yoxdur. Lakin məhkəmə prosesi uzadır. Prosesi avqustun 2-dək təxirə salmışdılar, indi də ayın 24-nə keçiriblər".

Qeyd edək ki, E. İsmayılov barəsində Rusiya Cinayət Məcəlləsinin "çirkli pulların yuyulması" və "dələduzluq" maddələri ilə ittiham irəli sürülüb. O, "Avrasiya Sənaye-Maliyyə Qrupu" Məhdud Məsuliyyətli Cəmiyyətinin sahibidir. Bu şirkətə Çelyabinsk qubernatorunun himayəsində olan bir şirkətin 1 milyon dollar məbləğində borcu var. Arbitraj Məhkəməsindən həmin şirkətin Etimad İsmayılovun şirkətinə borcu olmasını təsdiqləyən sənəd də verilib. Partiya sədrinin oğlu 2008-ci il martın 25-də gecə Bakıdan Moskvaya qayıdarkən Rusiya Federal Təhlükəsizlik Xidmətinin əməkdaşları tərəfindən Domodedovo hava limanında saxlanılıb.

Onu da xatırladaq ki, E. İsmayılovun da ittiham olunduğu cinayət işi 2007-ci ildə qaldırılıb. E. İsmayılovdan əlavə Ukrayna vətəndaşı, "Russkaya zernovaya kompaniya"nın baş direktoru Vladimir Quzov, vasitəçi strukturun rəhbəri Abbas Cəfərov və "Prodkorporasiya"nın rəhbəri Vladimir Şvadçenkonun da adları cinayət işində keçir.