Avqustun 12-də "Azərbaycan Hava Yolları" QSC-nin (Azal) İstanbul-Bakı reysinə bilet almış sərnişinlər birinci təyyarənin qəzaya uğraması ilə əlaqədar olaraq "Azal"ın göndərdiyi başqa iki təyyarə ilə Bakıya qayıdıb. Bu barədə "APA-Economics"ə "Azal"ın xidmət rəisi Məhərrəm Səfərli məlumat verib.
M.Səfərlinin sözlərinə görə, İstanbuldan avqustun 12-də "Azal"la Bakıya uçuş üçün bilet almış sərnişinlər geriyə "Airbus-319" təyyarəsi ilə qayıtmalı idi. Lakin təyyarə uçuş-enmə zolağından çıxaraq zədələndiyinə görə sərnişinlərin Bakıya gətirilməsi üçün şirkət İstanbula iki təyyarə - "Boeing-727-200" və "Boeing-757-200" markalı hava gəmilərini göndərib. İstanbuldan sərnişinlər Bakıya yerli vaxtla müvafiq olaraq saat 03:00-da və 07:40-da çatıb.
M.Səfərli hazırda qəzanın səbəblərinin araşdırıldığını və birgə komissiyanın təhqiqat apardığını qeyd edib. Qəzaya uğramış "Airbus-319" Türkiyədə təmir olunandan sonra geri qayıdacaq.
Qeyd edək ki, "Azərbaycan Hava Yolları" QSC-nin rəsmi açıqlamasında bildirilib ki, avqustun 12-də Türkiyə vaxtı ilə saat 10:40-da Atatürk Hava Limanında yerə enən təyyarənin uçuş-enmə zolağında dönərkən qabaq şassisi zolağın süni örtüyündən kənara çıxıb. Nəticədə təyyarənin ön hissəsi torpağa oturub. Təyyarədə olan 119 sərnişindən və 8 ekipajdan heç biri xəsarət almayıb. Hadisənin başvermə səbəblərini araşdırmaq məqsədi ilə "Azərbaycan Hava Yolları" QSC və Türkiyə Mülki Aviasiyasının rəsmiləri tərəfindən komissiyalar yaradılıb və təhqiqata başlanıb. İlkin araşdırmalara görə, təyyarə uçuş-enmə zolağına endikdən sonra hava gəmisinin kapitanı sürəti tənzimləyə bilməyib. Nəticədə qabaq şassinin ön dayağı qatlanıb və mühərrikin örtüyü zədələnib.
Ümumilikdə isə bu hadisə 05-23 saylı zolaqda baş verən sayca on doqquzuncu qəzadır. APA-nın Türkiyə KİV-inə istinadən verdiyi məlumata görə, Atatürk Hava Limanının 3 uçuş-enmə zolağından biri olan 05-23 saylı zolaq son vaxtlar belə hadisələrin daha çox yaşanması ilə yadda qalıb.
Türkiyə KİV-nin yaydığı məlumata görə, 05-23 saylı uçuş-enmə zolağı Atatürk Hava Limanında aparılan yenidənqurma işləri zamanı 300 metr uzadılaraq 2600 metrə çatdırılıb.
Bu arada Türkiyə Dövlət Hava Meydanları İşlətməsi (DHMİ) rəsmiləri mətbuata açıqlamalarında iddia ediblər ki, təyyarə zolağa gec enib və olay sürətin təyin edilən həddən çox olması nəticəsində baş verib.
|
