Göyçay rayon Prokurorluğunun müstəntiqi Avtandil Babayev vəzifəsindən azad edilib. Bu barədə "Turan"a Respublika Baş Prokurorluğunun mətbuat xidmətindən bildirilir. Onun barəsində Cinayət Məcəlləsinin 313-cü maddəsi ilə cinayət işi başlanıb. Müstəntiq Göyçay rayon sakini Nəriman Ağayevin şikayəti əsasında məsuliyyətə cəlb olunub. Belə ki, müstəntiq Avtandil Babayev tərəfindən Nəriman Ağayevin qızı Zümrüdün 20 noyabr 2009-cu il tarixdə yaşadığı evdə ölməsi faktı ilə əlaqədar hərtərəfli, tam və obyektiv araşdırma aparılması təmin olunmayıb.
Baş Prokurorluğun İstintaqa Nəzarət İdarəsi tərəfindən aparılan əlavə araşdırma zamanı müəyyən olunub ki, 3 iyul 2010-cu il tarixdə qanunla müəyyən edilmiş qaydada meyit eksqumasiya olunmaqla, Məhkəmə-Tibbi Ekspertiza və Patoloji Anatomiya Birliyi tərəfindən təkrar komission məhkəmə-tibbi ekspertizası keçirilib. Nəticədə birliyin Göyçay rayon şöbəsinin eksperti E.Əmiraslanov tərəfindən Zümrüd Ağayevanın meyiti daxili müayinə edilmədiyi halda, məhkəmə-tibbi müayinə haqqında akt tərtib edilərkən saxtakarlığa yol verildiyi, həmin aktda müstəntiq Avtandil Babayevin daxili müayinə zamanı iştirakı göstərilsə də, sonuncunun meyitin ilkin daxili müayinəsində iştirak etmədiyi və qeyd edilən pozuntuların aradan qaldırılması üçün vaxtında tədbirlər görmədiyi müəyyən edilib.
Qeyd edək ki, sözügedən müstəntiqin mərhumun hüzn içərisində olan valideynləri ilə qeyri-insani rəftarı barədə mətbuatda yazılar getmiş, hadisə ictimaiyyətin diqqət mərkəzinə düşmüşdür. Baş prokurorun onun barəsində sərt ölçü götürməsinin səbəbi bununla izah edilə bilər.
|
