Artıq Bakı dəmiryolu sərnişin stansiyasının vasitəsilə bölgələrə səfər edən sərnişinlər birbaşa və geriyə bilet satışı sistemindən istifadə edə biləcəklər. Bu barədə "Azərbaycan Dəmir Yolları" QSC mətbuat xidmətinin rəisi Nadir Əzməmmədov xəbər verir.
N.Əzməmmədovun sözlərinə görə, yeni sistemin tətbiqinin birinci günü Bakı sərnişin stansiyasından birbaşa və geriyə 44 bilet satışı həyata keçirilib.
Eyni zamanda, həmin tarixdən Azərbaycanın qərb bölgəsində kompüter quraşdırılmış xətti stansiya və bilet kassalarına satış üçün ayrılmış yerlər ləğv olunaraq Mərkəzi Məlumat Bazasına daxil edilib. Mərkəzi Məlumat Bazasının yaradılması ilə əlaqədar xətti stansiyalar üçün ayrılmış bron yerlər ləğv olunub. Hazırda Bakı sərnişin stansiyası, Gəncə vağzalı və respublikanın qərb zonasındakı xətti stansiyalarda fəaliyyət göstərən bütün bilet kassalarında bilet satışı Mərkəzi Məlumat Bazasından istifadə etməklə tətbiq olunur.
N.Əzməmmədov onu da bildirib ki, bilet satışı texnologiyasının kompüterləşdirilməsi və AİS "Ekspress-AZ" sisteminin genişləndirilməsi proqramına uyğun olaraq, "Azərbaycan Dəmir Yolları" QSC sədri Arif Əsgərovun müvafiq əmri ilə respublikanın qərb zonasındakı xətti stansiyalarda fəaliyyət göstərən bütün bilet kassalarında beynəlxalq internet şəbəkəsinə qoşulmuş kompüter proqramı tətbiq olunur. Bu proqramın tətbiqi ilə qərb bölgəsi üzrə hər bir kassa üçün əvvəlcədən ayrılmış yerlərin qabaqcadan birbaşa və geriyə satışına, boş yerlərin Birləşmiş Yol Bürosu vasitəsilə sonrakı stansiyalara ötürülməsinə, eyni zamanda sərnişin sıxlığına operativ nəzarət olunur.
Xatırladaq ki, apardığı islahatlar nəticəsində Bakı-Gəncə marşrutu üzrə hərəkət edən reys ixtisara salınmışdı. Bundan sonra ölkə başçısının müvafiq göstərişi ilə avtobusların gecə hərəkətləri də məhdudlaşdırıldı. Bütün bu məhdudiyyətlər isə qərb istiqaməti üzrə hərəkət edən Bakı-Qazax-Böyük Kəsik və Bakı-Ağstafa qatarlarında sərnişin sıxlığına səbəb oldu. Sərnişinlər sözügedən istiqamətə bilet almaq üçün 2-3 gün öncə kassalara müraciət etsələr də, yerlərin dolduğu bildirilirdi. Bundan başqa, sərnişin sıxlığından istifadə edən kassirlər bilet qiymətlərini süni şəkildə artırmağa da müvəffəq olmuşdular. Bütün bu problemləri yaşamamaq üçün sərnişinlər hər iki tərəfə qabaqcadan bilet almağa daha çox üstünlük verirlər.
|
