Sentyabrın 13-də BMT-nin Beynəlxalq Məhkəməsində Gürcüstanın Rusiyaya qarşı iddiası ilə bağlı məhkəmə dinləmələri başlayacaq. APA-nın BMT-nin rəsmi saytına istinadən verdiyi məlumata görə, Cənubi Osetiyada silahlı münaqişə bitəndən sonra - 2008-ci il avqustun 12-də Gürcüstan BMT-nin Beynəlxalq Məhkəməsinə müraciət edərək, Moskvanı irqi ayrı-seçkiliyin bütün formalarının ləğvi haqqında Beynəlxalq konvensiyanın müddəalarını pozmaqda günahlandırıb.
Dinləmələr sentyabrın 13-dən 17-dək davam edəcək, iki raundda keçiriləcək şifahi debatlar zamanı tərəflər öz mövqelərini bildirəcək və müdafiə üçün arqumentlərini ortaya qoyacaqlar. Tiflis iddia baxılana kimi müvəqqəti tədbir kimi məhkəmədən xahiş edib ki, Cənubi Osetiya və Abxaziyada yaşayan Gürcüstan vətəndaşlarının hüquqlarını təmin etməyi Rusiyadan tələb etsin. Gürcüstan öz iddiasında bildirib ki, 1990-cı ildən başlayaraq Rusiya bu regionda etnik gürcü və digər qrup əhaliyə qarşı sistematik olaraq etnik ayrı-seçkilik tədbirlərinə əl atır.
Xatırladaq ki, 2008-ci il oktyabrın 15-də BMT-nin Beynəlxalq Məhkəməsi müvəqqəti tədbirlər barədə qərarını açıqlayıb. Qərarda həm Gürcüstan, həm də Rusiya irqi ayrı-seçkilik və onun dəstəklənməsi ilə bağlı istənilən aktlardan çəkinməyə çağırılır.
Gurcustan,Rusiya,mehkeme
|
