Sentyabrın 14-də Bakıda Azərbaycan, Gürcüstan və Rumıniya prezidentlərinin iştirakı ilə AGRI layihəsinin (Azerbaiyan - Georgia - Romania Interconnector) dəstəklənməsi üzrə zirvə görüşü nəzərdə tutulub. Bu barədə "APA"ya Azərbaycan Sənaye və Energetika Nazirliyi mətbuat xidmətindən məlumat verilir.
Sammitdə Azərbaycan, Gürcüstan və Rumıniya prezidentləri tərəfindən Bakı Bəyannaməsinin imzalanması gözlənir. Birgə bəyannamənin razılaşdırılması məqsədi ilə Bakıda sentyabrın 6-da ekspertlərin, sentyabrın 13-də isə üç dövlətin müvafiq nazirliklərinin rəhbərlərinin iştirakı ilə görüş keçiriləcək.
Üç ölkə prezidentlərinin Bakı sammitində Avropa Komissiyasının sədri və enerji məsələləri üzrə komissarının da iştirakı gözlənir.
Qeyd edək ki, Azərbaycan, Gürcüstan və Rumıniya arasında AGRI layihəsinin reallaşması ilə bağlı anlaşma memorandumu 2010-cu il aprelin 13-də Buxarestdə imzalanıb. AGRI layihəsi çərçivəsində gələcəkdə Azərbaycan təbii qazının Qara dəniz sahillərinə nəqli, burada xüsusi terminalda sıxılması, Qara dəniz vasitəsilə tankerlə Rumıniyanın Konstansa limanındakı terminala çatdırılması, daha sonra isə yenidən bu ölkənin ərazisində mövcud qaz infrastrukturu şəbəkəsi ilə Rumıniya və digər Avropa ölkələrinin tələbatlarının ödənilməsinə yönəldilməsi planlaşdırılır. Gələcəkdə Azərbaycan qazını Avropa Birliyi ölkələrinə ixrac etmək üçün Konstansadan Bolqarıstan və Macarıstana iki ayrı kəmər çəkilişi də nəzərdə tutulur.
Layihə çərçivəsində Konstansa (Rumıniya) və Kulevi (Gürcüstan) limanlarında maye qaz terminalları yaradılacaq.
Azərbaycan prezidenti mayın 24-də Buxarestdə imzalanmış "Mayeləşdirilmiş təbii qaz və onun nəqli sahəsində əməkdaşlıq haqqında Anlaşma Memorandumu"nun təsdiq edilməsi barədə sərəncam imzalayıb. Sərəncamda Azərbaycan Sənaye və Energetika Nazirliyinə memorandumun həyata keçirilməsini təmin etmək tapşırılır.
|
