Kriminal - Ayna.az

Bakı İstintaq Təcridxanasında intihar hadisəsi baş vermişdir. Bu barədə Sabunçu rayon Prokurorluğundan bildirilir. Hadisə avqustun 2-dən 3-nə keçən gecə qeydə alınıb. ƏN Penitensiar Xidmətinin Sabunçu rayonundakı İstintaq Təcridxanasında saxlanan 41 yaşlı Alim İsmayılov özünü kamerada asmışdır. Onun özünü öldürməsinin səbəbləri barədə hələlik heç bir məlumat yoxdur.

Alim İsmayılov CM-nin 234.1-ci (satış məqsədli olmadan narkotik vasitələrdən istifadə etmə) maddəsi ilə təqsirləndirilərək barəsində həbs-qətimkan tədbiri seçildiyi bildirilir. Faktla bağlı cinayət işi başlanıb, istintaq aparılır.

Qusar sakini özünü bıçaqlayıb

Qusar şəhər sakini, 66 yaşlı Baləli Yumadiddin oğlu Novruzov qarın nahiyəsindən yara ilə rayon xəstəxanasına çatdırılıb və hazırda reanimasiya şöbəsində müalicə altındadır. Onun vəziyyəti ağır olaraq qalır. Polis şöbəsindən bildirilir ki, onun özünü bıçaqladığı güman olunur. Xəstə ayılmadığı üçün hələlik ifadə almaq mümkün olmayıb.

Həmkəndlisini döyərək öldürüb

İsmayıllı sakini öz həmkəndlisini döyərək öldürmüşdür. Bu qətl hadisəsi barədə İsmayıllı polisindən bildirilmişdir. Hadisə avqustun 2-dən 3-nə keçən gecə Sumağallı kəndində baş verib. Kənd sakini, 1959-cu il doğumlu Eldar Qaytaqov həmkəndlisi tərəfindən döyülüb və aldığı xəsarətdən yerindəcə keçinib. Onun meyiti meşə massivində yaxınları tərəfindən hadisə baş verəndən bir neçə saat sonra aşkarlanıb. Meyitə ilkin baxış zamanı ekspertlər onun işgəncə ilə öldürüldüyünü müəyyən ediblər.

Baş vermiş hadisə ilə bağlı yerli hüquq-mühafizə orqanları əməliyyat-istintaq qrupu yaradıblar. Hadisə ilə bağlı bu kəndin sakini, 1972-ci il doğumlu Hikmət Mirzəyev saxlanıb.

REKLAM

O, şəxsi zəmində münaqişə zamanı daş parçası ilə Eldar Qaytaqovun başından vuraraq öldürdüyünü etiraf etmişdir. Belə ki, Göyçay sahilində piknik təşkil ediblər, sonra aralarında mübahisə baş verib və oradan gediblər. Sonra yolda rastlaşıblar. Hikmət daşla Eldarın başından vurub öldürüb və hadisə yerindən qaçıb. Faktla bağlı cinayət işi qaldırılıb.

Özünü tövlədə asıb

Şəki rayonunun Qaracənnət kənd sakini, 1966-cı il doğumlu Qocayev Ağalar Məhəmməd oğlu həyətində tikilmiş tövlədə özünü asaraq intihar etmişdir. Rayon polis şöbəsindən verilən bilgiyə görə, Ağalar Qocayev əsəb xəstəliyindən əziyyət çəkirmiş və Şəki Əsəb Xəstəlikləri Dispanserində qeydiyyatda olmuşdur. Faktla bağlı cinayət işi başlanıb, istintaq aparılır.

Qaraçuxurda müdhiş qətl

Paytaxtın Suraxanı rayonunun Qaraçuxur qəsəbəsində qətl hadisəsi baş vermişdir. Bu barədə rayon polisindən bilgi verilmişdir. Şəki rayonunun sakini, 31 yaşlı Xaqani Cabbarov iki uşağı olan ərli qadını qaçırmış, paytaxta gətirmiş və Qaraçuxurda mənzil tutaraq birlikdə yaşamağa başlamışdır. Qadının qardaşı 25 yaşlı Arif Məmmədov onları axtarmış və ünvanlarını öyrənərək oraya gəlmiş, evə daxil olaraq çoxsaylı bıçaq zərbələri ilə onu öldürmüşdür. Qadın uşaqlarını götürüb hadisə yerindən uzaqlaşmağa macal tapmışdır. Arif Məmmədov polisdə bildirmişdir ki, onların hamısını öldürmək niyyəti varmış, yalnız birini öldürə bilmişdir. Hadisə ilə bağlı cinayət işi başlanıb, istintaq gedir.

Saxta diplom satan

DİN Baş Mütəşəkkil Cinayətkarlıqla Mübarizə İdarəsi əməkdaşlarının əməliyyat-axtarış tədbirləri nəticəsində saxta diplom satan şəxs yaxalanıb. Paytaxt sakinləri Namiq Əliyev və Samir Əfəndiyev Şirvan şəhər sakini Güllü Nağıyevaya guya, ADU "Fars dili tərcüməçisi" fakültəsini bitirməsi barədə diplomu 5000 dollara satarkən tutulmuşlar. Saxta diplom satanların əvvəllər də məhkum olunduqları bildirilir.

Soyğunçular yaxalanıb

Soyğunçuluqla məşğul olan mütəşəkkil dəstə zərərsizləşdirilib. Bakı şəhər Baş Polis İdarəsindən bildirilib ki, avqustun 3-də gecə saat 02:30 radələrində paytaxtın Neftçilər prospektində Nizaməddin Nəbiyev, Bahadur Mustafayev, Rəşadət Mustafayev, Murad Budaqov, Səbuhi Əliyev və Kənan Quliyev Gəncə şəhər sakini Ziya Sadıxovu döyərək mobil telefonunu, sənədlərini və açarlarını alaraq soyğunçuluq ediblər. Onlar Səbail polisi tərəfindən yaxalanmışlar. Bəlli olub ki, onlar iyulun 31-də həmin səmtdə başqa bir şəxsi - Seymur Məmmədovu döyərək mobil telefonunu alıblar. İndi onların digər cinayət əməllərinin olub-olmadığı araşdırılır.

(APA-nın materialları əsasında hazırlanmışdır)