ABŞ-ın sosioloji araşdırmalarla məşğul olan "Gallup" təşkilatının avqustun 5-də yaydığı sorğu nəticələrinə görə, MDB-nin 70 milyon sakini işləmək, ya da oxumaq üçün xarici ölkələrə getmək istəyir. Onların da yarısı birdəfəlik ölkələrindən köçmək istəyirlər. Bu barədə Azadlıq radiosu xəbər verir.

Birdəfəlik köçmək, yaxud heç olmasa, müvəqqəti iş, ya da təhsil dalınca başqa ölkələrə getmək istəyənlərin sayı Ermənistanda başqa ölkələrdən daha çoxdur. Bu ölkənin xaricdə başqa qonşularından daha çoxsaylı diasporu var. Ehtimallara görə, hazırda xarici ölkələrdə Ermənistanın özündən daha çox erməni yaşayır.Ermənistan bu sırada yalnız Moldovadan geridə qalır. Moldovalıların 53%-i imkan düşsə, dərhal ölkəsini tərk edəcəyini deyib. İşsizliyin yüksək səviyyədə olması, xaricdəki yaxınlarının göndərdiyi puldan hədsiz asılılıq Moldova vətəndaşlarını başqa ölkələrə üz tutmağa məcbur edir. Bu ölkədə az qala hər ailədən bir nəfər xarici ölkədə işlədiyini deyib.

Moldovada sorğuya cəlb olunanların 54%-i, Ermənistanda 32%-i, Belorusda 30%-i bildirib ki, əgər köçsələr, başqa ölkələrdə onlara kömək edəcək yaxın adamları var və son bir il ərzində onlardan pul, yaxud hansısa formada yardım alırlar. Moldovalıların 53%-i imkan düşsə, dərhal ölkəsini tərk edəcəyini deyir.

Qafqazdan Mərkəzi Asiyaya qədər olan regionda adamlar xarici ölkələrə oxumağa, ya da işləməyə getməyi birdəfəlik köçməkdən daha üstün tuturlar. Onlar yalnız yemək və yaxşı dolanmaq üçün ölkələrini tərk etmək istəmirlər.

Başqa sözlə, rəyi soruşulanlardan üçdə-ikisi birdəfəlik başqa ölkələrə köçmək istəmədiklərini deyiblər. Başqa ölkəyə gedənlərin də çoxu bildirib ki, təcrübəli və savadlı işçi kimi peşəkarlıqlarını artırandan sonra ölkələrinə dönmək istəyirlər.

"Gallup" bu sorğusunu 2009-cu ildə 15 yaşdan yuxarı olan 13200 adam arasında keçirib. Region ölkələrinin hər birindən ən azı min nəfər sorğuya cəlb edilib.