İşgəncələrə Qarşı Azərbaycan Komitəsinin sədri Elçin Behbudov Ağır Cinayətlərə Dair İşlər üzrə Məhkəmənin və Bakı şəhəri rayonlarının məhkəmələrindəki təqsirləndirilən şəxslərin saxlanma yerlərində monitorinqlər keçirib. Elçin Behbudovun APA-ya verdiyi məlumata görə, Ağır Cinayətlərə Dair İşlər üzrə Məhkəmədəki saxlanma yeri normal vəziyyətdədir:
"Məhkumlar saxlanma şəraitindən və onlara münasibətdən razıdırlar. Gündə bir dəfə yeməklə təmin olunurlar. Lakin 4 nəfər təqsirləndirilən şəxs istintaq orqanlarından, ibtidai istintaqın düzgün aparılmamasından şikayət etdi".
Hüquq müdafiəçisi rayon məhkəmələrindəki saxlanma yerlərinin normal vəziyyətdə olmadığını deyib:
"Mən rayon məhkəmələrindəki vəziyyəti bəyənmədim. Nəsimi, Xətai və digər rayon məhkəmələrindəki saxlanma yerlərinin əsaslı təmirə ehtiyacları var. Bundan əlavə, oradakı vəziyyət də standartlara cavab vermir".
|
