Bu gün AXCP, Müsavat Partiyası və Demokratiya Uğrunda İttifaq (DUİ) saat 17:00-da birgə etiraz aksiyası keçirəcək.
Bu barədə "Turan"a Müsavat Partiyası Gənclər Təşkilatının sədri Tural Abbaslı məlumat verib. Onun sözlərinə görə, bu aksiya əvvəlkilərdən fərqli olacaq. Amma bu fərqlilik hələ ki, sirr saxlanılır.
Habelə T.Abbaslı bildirib ki, aksiya qabağı mülki geyimli şəxslər artıq yaşadığı evin qarşısını nəzarətdə saxlayıb. Bununla belə, ötən gün Nəsimi rayon 21-ci polis bölməsinə çağırılaraq ondan aksiyada iştirak etməməsi üçün izahat almaq istəyiblər. Lakin Tural Abbaslı bundan imtina edib.
Öz növbəsində AXCP sədrinin müavini Fuad Qəhrəmanlı bildirib ki, meriya yenə "ənənəsinə" uyğun olaraq cavab məktubunda şəhərin ucqarlarındakı yerləri mitinq üçün təklif edib. Lakin yenə də müxalifət meriyanın təklifini qəbul etməyib. Aksiyanın şüarları da dəyişməz olaraq qalıb. Tələbimiz parlament seçkisi ərəfəsində azad seçki mühitinin yaradılması və Qarabağla bağlıdır", - deyə F.Qəhrəmanlı bildirib.
Qeyd edək ki, Azərbaycanda yuxarıda adları çəkilən partiyaların 2005-ci il noyabrın 26-da, yəni parlament seçkilərindən sonra "Qələbə" meydanında keçirdikləri aksiya polis zorakılığı ilə dağıdılıb. Bu aksiyadan sonra müxalifətə şəhərin mərkəzi meydanlarında aksiya keçirmək yasaq edilib. Buna baxmayaraq, müxalifət qüvvələri ayrı-ayrılıqda və pərakəndə şəkildə aksiyalar keçirməyə cəhd ediblər. Son günlər isə əsas müxalifət partiyaları birləşmək barədə və birgə mübarizə aparmağa dair bəyanatlar veriblər. Analitiklərə görə, bu çox gecikmiş bir addım olsa da, müxalifət düşərgəsinin təmərküzləşməsi üçün yeganə çıxış yoludur, amma bu yolun da nə qədər effektiv olacağı hələ ki, çoxlu suallar doğurur.
|
