Avropa Liqasında III təsnifat mərhələsinin ilk oyunları başa çatıb. Avrokuboklarda ölkəmizin yeganə təmsilçisi "Qarabağ" Krakov şəhərində Polşa kubokunun sahibi "Visla" ilə qarşılaşıb. Avropa Liqasında bu il beşinci matçına çıxan "Qarabağ" məğlubiyyətsiz oyunlar seriyasını davam etdirib.
Matçın favoriti meydan sahibləri olsalar da, Ağdam klubu bu çətin sınaqdan uğurla çıxıb. Avropa Liqasının əvvəlki mərhələlərində "Metallurq" (Makedoniya) və "Portadaun"u (Şimali İrlandiya) klublarını mübarizədən kənarlaşdıran "Qarabağ" Polşa komandasına da gücünü göstərib. Vüqar Nadirovun vurduğu qolla 1:0 hesablı qələbə qazanan komandamız hələ ötən yay Avroliqada uğurlu çıxışının təsadüfi olmadığını sübut edib. Doğrudur, Krakov təmsilçisi son dəqiqələrdə məğlubiyyətdən qaçmaq şansı qazanıb. Amma qapıçımız Fərhad Vəliyev 90-cı dəqiqədə hakimin təyin etdiyi şübhəli penalti zərbəsini dəf etməklə, hesabın bərabərləşməsinə imkan verməyib.
Şübhəsiz ki, "Qarabağ"ın bu oyunda qələbəsinə inananlar az idi. Ənənəvi olaraq Azərbaycan klublarının Polşa komandaları qarşısında duruş gətirə bilməməsi sanki tendensiya halını almışdı. Amma iki həftə əvvəl Bakı "İnter"inin Polşa çempionu "Lex"i səfərdə məğlub etməsindən (Azərbaycan çempionu əsas vaxtda qələbə qazansa da, penaltilərdə uduzaraq mübarizəni dayandırdı) sonra bu xoşagəlməz tendensiyanın bitəcəyinə də ümid artmışdı. "Qarabağ" bu məsələyə birdəfəlik nöqtə qoydu.
"Qarabağ"ın bu qələbəsi sözsüz ki, tarixi uğurdur. Çünki 1994-cü ildən avrokuboklarda çıxış edən Azərbaycan klublarından indiyə kimi heç birinə Polşa komandasını üstələmək nəsib olmamışdı.
"Visla" kimi sanballı kluba üstün gələn "Qarabağ" işin yarısını görüb. Vüqar Nadirovun vurduğu bir qol komandanın yarışların pley-off mərhələsinə çıxması və "Qarabağ"ın Azərbaycan futbolunda növbəti rekorda imza atması üçün gözəl imkan yaradıb. Belə ki, indiyə kimi heç bir klubumuza avrokuboularda üç mərhələ keçmək müyəssər olmayıb.
Yeri gəlmişkən, matçdan sonra "Qarabağ" futbolçuları qələbəyə o qədər də sevinmirdilər. Əvvəla, onlar anlayırdılar ki, səfər oyununda daha böyük hesabla qələbə qazanmaq olardı, ikincisi də Bakıdakı cavab matçı Krakovdakı oyundan qat-qat çətin olacaq.
"Qarabağ" rəqibini gələn həftə, avqustun 5-də Bakıda qəbul edəcək. "Visla"nın Bakıda itirəcəyi bir şey yoxdur, amma Qurban Qurbanovun komandası əldə etdiyi üstünlüyü qoruyub saxlamağı bacarmalıdır. Bunu isə etmək çox çətin olacaq.
|
