İyunun 19-da Tərtərin Çaylı kəndi istiqamətində Ermənistan silahlı qüvvələrinin hücumunu dəf edərkən bir neçə erməni əsgəri öldürmüş, özü isə həmin döyüşdə şəhidlik zirvəsinə ucalmış 22 yaşlı gizir Mübariz İbrahimov qəhrəman sayılıb. Prezident bu cəsur gizirə Azərbaycanın müstəqilliyinin və ərazi bütövlüyünün qorunub saxlanmasında müstəsna xidmətinə və göstərdiyi rəşadətə görə Azərbaycanın Milli Qəhrəmanı adının verilməsi (ölümündən sonra) barədə sərəncam imzalayıb.
Məlumata görə, dövlət başçısının bir başqa sərəncamı Azərbaycanın Milli Qəhrəmanı Mübariz Ağakərim oğlu İbrahimovun xatirəsinin əbədiləşdirilməsi haqqında olub. Prezident Biləsuvar rayonunda orta məktəblərdən və küçələrdən birinə Mübariz İbrahimovun adının verilməsini tapşırıb.
Şəhidin atası Ağakərim İbrahimov bildirib ki, prezident İlham Əliyevin bu fərmanı təkcə oğluna deyil, Vətən uğrunda canından keçən bütün şəhidlərə şamil olunur. Şəhidin atası Mübariz İbrahimovun Milli Qəhrəman adına layiq görülməsini ailələri üçün böyük təskinlik olduğunu deyib və tezliklə oğlunun meyitinin də doğma torpağa qovuşmasını arzulayıb.
Şəhidin müəllimi Valeh Ağayev bildirib ki, onun qəhrəmanlığı bütün Azərbaycan gəncləri üçün örnək oldu və biz müəllimləri onunla fəxr edirik: "Fəxr edirik ki, belə bir şagirdimiz var".
Qeyd edək ki, Azərbaycanın Milli Qəhrəmanı gizir Mübariz Ağakərim oğlu İbrahimov 1988-ci il fevralın 7-də Biləsuvar rayonunun Əliabad kəndində doğulmuşdur. 2005-ci ildə şəhid M.Piriyev adına Əliabad kənd orta məktəbini bitirib. Həmin il hərbi xidmətə çağırılıb. Daxili Qoşunların "N" saylı hərbi hissəsinin Xüsusi Təyinatlı Bölüyündə xidmət edib, çavuş rütbəsi alıb. 2007-ci ildə hərbi xidməti başa vurduqdan sonra bir müddət mülki işlərdə çalışıb. 2009-cu ilin avqust ayında öz arzusu ilə hərbiyə qayıdıb. Bu dəfə artıq gizir kimi xidmət keçməyə başlayıb. 2010-cu ilin aprel ayından Tərtər rayonunun "N" saylı hərbi hissəsində xidmət edib.
...2010-cu il iyunun 18-dən 19-na keçən gecə Tərtərin Çaylı kəndi istiqamətində Ermənistan silahlı qüvvələrinin hücumunu dəf edərkən düşməni ağır itkilərə məruz qoyaraq qəhrəmancasına həlak olub. Şəhid gizirin meyiti o vaxtdan düşmən tərəfin əlindədir. Qoy düşmən bilsin ki, şəhidlər ölməz, vətən bölünməzdir.
|
