İranın müxtəlif şəhərlərində narkotiklərin daşınması ilə məşğul olmuş şəxslərin edamlarının fonunda, bu ölkədən Azərbaycan Respublikasına narkotik qaçaqmalçılığı nəinki səngimək bilmir, əksinə, intensivlik artmaqdadır və bu tendensiya cəmiyyətdə narahatlıq doğurur. Bu mövzuda xəbərlərin intensivliyindən belə nəticəyə gəlmək olur ki, ölkəmizə qarşı gizli savaşın bu cəbhəsində durum ciddi şəkil almışdır.
Milli Təhlükəsizlik Nazirliyi tərəfindən narkotik vasitələrin qanunsuz dövriyyəsinə qarşı son bir ayda keçirilmiş əməliyyat tədbirlərinin qorxulu statistikası da bunu deyir. MTN-in bu əməliyyatları nəticəsində qaçaqmalçılıq yolu ilə narkotiklərin daşınması ilə məşğul olan 15 nəfər ifşa olunaraq yaxalanmış, onlardan ümumilikdə 425 kiloqram narkotik vasitə aşkar edilərək götürülmüş, 5 cinayət işi başlanmışdır. MTN-in ictimai əlaqələr mərkəzindən "Turan"a verilən məlumata görə, narkotiklərin daşınması ilə məşğul olan qruplardan əsasən həşiş və heroin müsadirə edilmişdir.
Bu qruplar "İran - Azərbaycan - Rusiya" marşrutu üzrə işləyirmişlər. Məsələn, narkotik vasitələrin qanunsuz daşınması ilə məşğul olan Azərbaycan vətəndaşları - Həsənov İmran, Mahmudov Rahib və Rusiya Federasiyasının vətəndaşı Cəlalov Camal Sankt-Peterburq şəhərində saxlanılıb, onlardan 397 kq həşiş aşkarlanaraq götürülüb.
Xəbərə görə, digər əməliyyat tədbiri nəticəsində Bakı sakini Əliyev Fazil saxlanmış, onun idarə etdiyi "Azsamand" markalı avtomobilə baxış zamanı 1 kiloqrama yaxın heroin aşkarlanaraq götürülmüşdür. Daha bir əməliyyat tədbirində Azərbaycan vətəndaşları - Rufullayev Elizbar, Quliyev Anar, Əliyev Ceyhun və Ağayev Dəyanət saxlanmış, narkotik vasitə olan - 16 kq 170,94 qram həşiş qətranı və 17 qramdan artıq heroin aşkarlanaraq götürülmüşdür.
Növbəti əməliyyat tədbirində Azərbaycan vətəndaşları - Babayev Ramiz, Quliyev Vüsal, Babaşov İlqar, Qarayev Zahir və Arayeşkar Tünzalə Həsənpaşa qızı saxlanmış, narkotik vasitə olan - 12 kiloqrama yaxın həşiş qatranı və 900 qrama yaxın heroin aşkar edilərək götürülmüşdür.
Digər əməliyyat tədbiri nəticəsində Lənkəran şəhər sakini Kazımov Rəşad və Şirvan şəhər sakini Hüseynov Ceyhun yaxalanıb, onlardan 100 qrama yaxın narkotik vasitə olan heroin aşkarlanaraq götürülüb. MTN bildirir ki, bütün faktlar üzrə cinayət işləri başlanılıb. Bu hüquqazidd əməllərin digər iştirakçılarının ifşası üçün zəruri istintaq hərəkətləri və əməliyyat-axtarış tədbirləri davam etdirilir.
Bütün bu hadisələr Azərbaycana uyuşdurucu partiyalarının ötürüldüyü qonşu İranda bu zəmində cinayətlərə görə edamların fonunda baş verir. Görünür, onlar ölkə daxilindəki bu əməllərinə görə ən ağır cəzaya məhkum olunurlar. Qonşu Azərbaycana - onların siyasətinin məcrasında getmək istəməyən bir ölkəyə isə cəza olaraq bu fəsad məqbul görünür. Savaş şiddətlənir.
|
