Röya sənətə ilk addımlarını atdığı vaxtlarda ailəsi onun müğənni olmasına icazə vermirmiş. Əvvəlcə söz təzyiqləri ilə üzləşən Röya daha sonra anası tərəfindən bir neçə dəfə döyülüb. Bunlardan biri isə küçədə, qonşuların gözü qarşısında baş verib:

"O zaman mən Vaqif Gərayzadənin yanına təzə-təzə gedirdim. Anam eşitdi ki, mən inadımdan dönməyərək müğənni olmağa qərar vermişəm. Hətta müəllim yanına gedib, qrupda oxumağa qərar vermişəm. Arvad çox əsəbiləşdi. Əlinə keçən oxlovla məni döyməyə başladı. Küçəyə qaçdım ki, bəlkə qonşulardan ayıb edib, üstümə gəlməz. Amma arvad o qədər hirsli idi ki, heç nə gözünə görünmürdü. Oxlovla məni yaxşıca əzişdirdi".

Röya deyir ki, oxlovun ağrılarını bir neçə gün çəksə də, həvəsindən daşınmadı. Döyülə-döyülə Vaqif müəllimin istedadlı tələbələrindən birinə çevrildi.

"Hərdən anam mənə xoş sözlər deyəndə, tez oxlov söhbətini yadına salıram. Bunlar hamısı keçmişdə qalıb, seçdiyim sənətə görə peşman deyiləm. Baxmayaraq ki, mənə çox təzyiqlər, təpkilər olub. Amma inadımdan döndərə bilməyiblər", - deyə Röya bildirdi.