Cari ilin I yarımilliyində avtomobil bazarında qiymətlər düşsə də, təklif tələbdən artıq olub. Yəni istər köhnə, istərsə də yeni avtomobilləri almağa əhalinin aztəminatlı və yoxsul təbəqələrinin imkanı yetmir. Bu səbəbdən bu ilin I yarısında maşınlarla bağlı təklif tələbdən kifayət qədər çox olub. Ancaq bununla belə, bu gün paytaxtda avtomobil idarə edənlərin sayı-hesabı bilinmir. Mütəxəssislərin fikrincə, bu, ictimai nəqliyyatın, yəni sərnişindaşıma xidməti göstərən nəqliyyat sektorunun hələ də normal fəaliyyət göstərmədiyi ilə əlaqədardır. Çünki bu sektorda xidmətlər normal səviyyədə olsa və vətəndaşları qane etsə, avtomobil bazarlarında bu qədər maşının satışa buraxılmasına və Bakı şəhərində saysız-hesabsız nəqliyyat vasitələrinə ehtiyac qalmaz. İyulun 1-dən etibarən tətbiqinə start verilmiş "Avro-2" standartları ilə əlaqədar Standartlaşdırma, Metrologiya və Patent üzrə Dövlət Komitəsinin hazırladığı siyahıya əsasən, MDB ölkələrindən və digər xarici dövlətlərdən ölkəmizə gətiriləcək avtomobillər, onların mühərrikləri yalnız son illərə aid olmalıdır. Bu amil Azərbaycandakı avtomobil bazarlarına necə təsir göstərəcək? sualını cavablandıran iqtisadçı Əli Əlirzayev deyir ki, belə qərarın verilməsi nəticəsində ilk növbədə ölkəmizə avtomobil gətirilməsi prosesi xeyli ləngiyəcək. Gətiriləcək maşınların sayı əvvəlki illərlə müqayisədə kifayət qədər azalacaq. Bazarlarda təzə maşınların sayında artım müşahidə olunacaq. Satıcılar, eləcə də maşın alveri ilə məşğul olanlar son illərin istehsalı olan avtomobilləri baha qiymətə satmaq məcburiyyətində qalacaqlar. Bir sözlə, daxili bazarda qiymətlər dəyişəcək:
"Yəni avtomobil bazarlarında köhnə maşınlara tələbat çoxalacaq və onların da qiyməti artacaq. Bu da köhnə avtomobillərdən istifadəni daha da sürətləndirəcək. Ona görə də ölkə ərazisində köhnə, istismar müddətini başa vurmaq üzrə olan avtomobillərdən istifadə də sürətlənəcək". Yeri gəlmişkən, bir sıra ölkələrə, məsələn, qonşu İrana xarici istehsala məxsus avtomobillər, demək olar, gətirilmir. Bu ölkədə daha çox yerli istehsala məxsus nəqliyyat vasitələrinə üstünlük verilir və onlara daha çox ehtiyac duyulur. Azərbaycanda da belə bir sistemi tətbiq etmək, avtomobil və maşınqayırma sənayesini inkişaf etdirmək mümkündür. İqtisadçı da bu fikirlə razılaşır:
"Başqa dövlətlərdə olduğu halda, Azərbaycanda nəyə görə avtomobil və maşınqayırma sənayesi inkişaf etdirilməməlidir? Mən bu qənaətdəyəm ki, ölkəmizdə avtomobil istehsal edən zavodlar tikilməlidir. Çünki ölkəmizdə bunun üçün potensial imkan, normal şərait və işçi qüvvəmiz var. Digər tərəfdən, sözügedən sənaye sahəsinin inkişafında Azərbaycanın neft ölkəsi olması amili də nəzərə alınmalıdır".
|
