Ağaxan Abdullayev: "Gənclər çox işləməyi öyrənməlidirlər"

Xalq artisti, xanəndə Ağaxan Abdullayev bu qənaətdədir ki, bu gün sənətkar yetişdirmək çox çətindir. Xatırladır ki, yaxşı sənətkarın yetişməsi üçün illər lazımdır. Amma Ağaxan Abdullayevin gileyi qədər-qismətlə bağlı olsa da, gələcəyə nikbinliklə baxır:

"Sənətkarlar 20-30 il çalışırlar. Püxtələşmiş, zirvəyə qalxdığı vaxtda isə ömür vəfa qılmır. Bunu böyük sənətkarlar haqqında həmişə deyirəm. Onların vaxtsız vəfatı bizə çox pis təsir edir. Düzdür, ömür Allahın əlindədir. Bu nə dostların, nə də qohumların yardımı ilə düzəlir".

Onun fikrincə, sənətkarlar bundan sonra da yetişəcək. Lakin o bu qənaətdədir ki, hər dövrün öz sənətkarı olur. Onun sözlərinə görə, sənətə yeni gələnlər heç vaxt əvvəlki sənətkarları təkrarlamayacaqlar:

"Heç kim heç kimin yerini tutmur. Heç oğul da atasının yerini tuta bilmir. Ola bilər ki, oğul atadan da irəlidə olsun. Bizdən əvvəl də böyük sənətkarlar olub. Bizdən sonra da yaxşıları olacaq".

Son dövrlər yeni nəsil xanəndə və müğənnilər əvvəlki nəsil tərəfindən tənqid atəşinə tutulsa da, Ağaxan Abdullayev yeni nəsildən razıdır. O bu qənaətdədir ki, yeni sənətçilər arasında istedadı olanlar var.

REKLAM

Sadəcə, onlar çox çalışmalıdırlar:

"Gənclər öz üzərlərində işləməyi öyrənməlidirlər. Sənətə gözəl səsli xanəndələr gəlirlər. Onların gələcəyinə inanıram. Sadəcə, zəhmətkeş olmalıdırlar. Bunu etsələr, xanəndə ola bilərlər".

Sənətkarın estradaya baxışı isə fərqlidir. Onun fikrincə, oxuyan çox olsa da, onların arasında sənətkar azdır:

"Ümumiyyətlə, hər dövrdə istər estradada, istərsə də muğam sənətində sənətkarlar az-az yetişir. İndi estradada vəziyyət belədir. Xeyli oxuyan var. Sənətkar isə barmaqla sayılası qədərdir".

Xanəndə Alim Qasımov isə hesab edir ki, bir müddət sonra onu unutduracaq sənətkarlar peyda olacaq:

"Həyatda hər şey dəyişir. İnsanlar da elədir. İnsanların yerini doldurmaq həyatın öz qanunudur. İnşallah, elə gənclər gələcəklər ki, bizi də unutduracaqlar. Həyat heç kimlə bitmir. Məncə, həyata bədbin baxmaq düz deyil. Sənətkarlar dünyasını dəyişirlər, yerlərinə başqası gəlir. Bu, həmişə belə olacaq".

Canəli Əkbərov da həmkarları ilə eyni fikirdədir. O da ümid edir ki, yaxın vaxtlarda əsl sənətlə məşğul olan istedadlara meydan açılacaq.