Tarixçi alim və "Şərq" qəzetinin redaktoru Akif Aşırlı keçən il nəşr etdirdiyi "Azərbaycan mətbuat tarixi" kitabının II hissəsini də işıq üzünə çıxardı və 1920-1990-cı illəri əhatə edən bu hissənin Atatürk Mərkəzində media isimlərinin iştirakı ilə təqdimatı keçirildi.
Milli mətbuatımızın 135 illiyinin qeyd edildiyi bu günlərdə belə bir kitabın işıq üzü görməsini və onun təqdimatını Rəşad Məcid bu yubileyin ən önəmli tədbirlərindən biri adlandırdı. Rəşad Məcid qeyd etdi ki, 1920-1990-cı illər zaman kəsimində mövcud olmuş mətbuata bu gün münasibət birmənalı deyil, lakin onda qürur duyulmalı, öyrənilməli məqamlar az deyildir, bu mənada Akif Aşırlının "Azərbaycan mətbuat tarixi" kitabının bu hissəsi qiymətlidir. Burada biz gözdən keçirilən dövrdə mövcud olmuş mətbuat orqanlarının hansı zərurətdən yarandığı və nə kimi bir yol keçdiyi göz önündə sərgilənir.
Kitabın elmi redaktoru, professor Cahangir Məmmədli (BDU) də deyir ki, jurnalistikamız üçün sovet dövrü mürəkkəb bir dövrdür, bu dövrə dair çox şeyi inkar etmişik, amma elə şeylər var ki, onları inkar etmək mümkün deyil. Cahangir Məmmədli müəllifin mövzuya həm xronoloji, həm də tipoloji yanaşmasını düzgün saydı. Yəni mətbuatımız həm tarixi dövrlərə, həm də ideoloji məsələlərə görə təsnif olunmuşdur. 135 illik tarixi olan mətbuatımızın şərəfli bir yol keçdiyini xatırladan professor hesab edir ki, bu kitab jurnalistika tariximizdə mövcud olan müəyyən bir boşluğu doldurur.
BDU-da jurnalistikanın tədrisi ilə məşğul olan dosent Akif Rüstəmov da öz növbəsində kitaba dəyər verdi. Alim qeyd etdi ki, "Doğrudur, Qərb mətbuatı ilə müqayisədə bizim yaşımız azdır, lakin Azərbaycan mətbuatı şərəfli bir yol keçmişdir. Mətbuat tarixində heç nə, hətta "samizdat"lar da unudulmamalı, hər fəaliyyətin öz real qiyməti verilməlidir".
Müəllifi belə bir kitabın işıq üzü görməsi münasibətilə təbrik edən və ona uğurlar diləyən Azərbaycan Jurnalistlər Birliyinin sədri Elçin Şıxlı da bu nəşri yüksək qiymətləndirdi və bu kitaba görə müəllifin bu il Həsən bəy Zərdabi mükafatına təqdim olunduğunu söylədi. Elçin Şıxlı bu mükafatı müəyyən mənada "avans" adlandırdı və əmin olduğunu bildirdi ki, müəllif 1990-cı ildən sonrakı müstəqillik dövrümüzün - mətbuatımız üçün keçid dövrünün də tarixini yazacaqdır.
Xatırladaq ki, Akif Aşırlının "Azərbaycan mətbuat tarixi" kitabının I hissəsi 1875-ci ildən 1920-ci ilə qədərki dönəmini əhatə edirdi. Haqlı olaraq qeyd edildiyi kimi, obyektiv qiymət verə bilmədiyimiz sovet dönəminin mətbuat tarixi isə ilk dəfə Akif Aşırlı tərəfindən populist yanaşmadan uzaq olmaqla tədqiq edilir, onun mənzərəsi verilir və 80-ci illərin sonlarında çağdaş jurnalistikaya keçid dönəmi təhlil olunur.
Müəllif özü deyir: "Sovet dövrü jurnalistikamıza bu gün birmənalı münasibət yoxdur, fərqli fikirlər səslənir. Belə bir kitaba ehtiyac olduğunu gördüm və boşluğu doldurmağa çalışdım. Bu kitab eyni zamanda mənim Azərbaycan mətbuat tarixinin niyə yazılmadığı sualına özümün tapdığım cavabdır. Mən, sadəcə, bu proseslərə bir vətəndaş olaraq tərəfsiz və qərəzsiz, obyektiv şəkildə yanaşmağa çalışdım".
|
