Qonşu Gürcüstan ərazisində, özəlliklə paytaxt Tbilisinin qədim məhəllələrində yerləşən tarixi kilsələrin mənsubiyyəti üstündə ermənilər və yerli gürcülər arasında vaxtaşırı mübahisələr qopur. Hətta buna iki ölkənin kilsə rəhbərləri, siyasi rəhbərlik də müdaxilə etməli olur. Ermənilər sıxışdırmaya məruz qaldıqları, tarixi abidələrinin "şovinist gürcülər" tərəfindən qəsb edildiyi barədə beynəlxalq qurumlara şikayətlər də edirdilər. Lakin bu dəfə oğurluq üstündə yaxalanmış duruma düşüblər.
Bu günlərdə həmin mübahisələrin birinə aydınlıq gəlib. Söhbət Tbilisidə yerləşən, indi ermənilərə aid olan Muqni kilsəsindən gedirdi. Gürcülər bu kilsənin tarixən onlara məxsus olduğunu bilir, lakin bunu ermənilərə sübut edə bilmirdilər. Nəhayət, həmin kilsənin ətrafında qazıntı işləri aparmalı olmuş və kilsənin gürcü kilsə mədəniyyətinə aidliyi sübuta yetirilmişdir. Bəlli olub ki, bu kilsənin təməli XIII-XIV yüzillərdə xristian gürcülər tərəfindən qoyulubmuş. Sonrakı yüzillərdə isə ermənilər bu kilsəni mənimsəmişlər. Gürcülərdə isə bu kilsənin onlara aidliyi barədə şübhələr mövcud idi. Lakin əldə sənəd yox idi. Odur ki, arxeoloji qazıntılara qərar verilmişdir. Bu barədə Gürcüstan Milli Muzeyinin arxeoloji mərkəzinin rəhbəri Quram Mirsxulava mediaya açıqlama vermişdir.
Qeyd edək ki, erməni tərəfi bu açıqlamanı hiddətlə qarşılamış və onun doğruluğunu şübhə altına alan yazılar yaymışlar. Lakin 1356-cı ildə inşa olunmuş bu kilsənin ermənilərə nə dərəcədə aidliyini sübut edən sənəd yaxud fakt təqdim etməyiblər. Gürcü tərəf isə konkret arxeoloji faktlardan danışır...
|
