Dünən Bakı Biznes Mərkəzində Azərbaycan Respublikası ilə Avropa Birliyi arasında assosiasiya sazişi üzrə danışıqlar başlayıb ("Turan"). Danışıqlara Azərbaycan tərəfdən xarici işlər nazirinin müavini Mahmud Məmmədquliyev, AB tərəfindən isə birliyin danışıq qrupunun rəhbəri Cohn Krayer rəhbərlik edir.
Assosiativ saziş layihəsi Avropa Birliyi ilə Azərbaycan arasında siyasi, təhlükəsizlik, iqtisadiyyat, ticarət, qanunun aliliyi, demokratiya, insan haqlarına hörmət, bazar iqtisadiyyatının genişləndirilməsi sahəsində əməkdaşlıq məsələlərini nəzərdə tutur.
"Azərbaycan Avropa Birliyi ilə assosiasiya sazişinin imzalanacağını çox müsbət qarşılayır. Hesab edirik ki, bu sazişin imzalanması ölkədə islahatların daha da dərinləşməsinə təkan verəcək", - xarici işlər nazirinin müavini Mahmud Məmmədquliyev qeyd edib.
Onun fikrincə, sazişdə siyasi təhlükəsizlik və təhsil sahələrinə daha geniş yer verilməlidir: "Regionda siyasi stabillik, təhlükəsizlik, o cümlədən Ermənistan-Azərbaycan münaqişəsinin həlli məsələlərinə diqqət ayrılmalıdır".
Mahmud Məmmədquliyev deyib ki, Azərbaycan Avropa Birliyinə "Müasirləşmə haqqında" sənədin imzalanmasını da təklif edib. "Azərbaycan bu sənədi yaxın zamanda Avropa Birliyinə təqdim edəcək. Sənəd iqtisadi sahədə, demokratik təsisatların inkişafı, mütəşəkkil cinayətkarlıq, çirkli pulların yuyulması, korrupsiyaya qarşı birgə mübarizəni nəzərdə tutur", - nazir müavini bildirib.
Avropa Birliyi danışıq qrupunun rəhbəri Cohn Krayer bildirib ki, assosiasiya sazişi ilə bağlı Cənubi Qafqazda danışıqların eyni vaxtda başlaması əməkdaşlıqda yeni mərhələnin başlanğıcıdır. "Sənəd iqtisadi, ticarət, bazar iqtisadiyyatının genişləndirilməsi, yaxşı idarəçilik, demokratiya sahəsində Azərbaycan və regionla əməkdaşlığın inkişafına təkan verəcək", - o qeyd edib.
O, Azərbaycanın Ümumdünya Ticarət Təşkilatına qəbulunu arzuladığını diqqətə çatdırıb: "Bu, əməkdaşlıqda mühümdür".
Tərəflər assosiasiya sazişi üzrə danışıqların müvəffəqiyyətlə başa çatacağını bildiriblər.
|
