Cənubi Afrikada keçirilən 19-cu dünya futbol çempionatı İspaniya milli komandasının qələbəsi ilə başa çatdı. İlk dəfə "Qara qitə"də təşkil olunan mundial futbol tarixinə yeni dünya çempionu bəxş etdi.

Dünya çempionatının başa çatmasından bir həftə ötsə də, yarışla bağlı müzakirələr hələ davam edir və yəqin ki, bir müddət davam edəcək. Çempionata gəlincə, Hollandiya və İspaniya yığmaları arasında keçirilən matç yarışın sonuncu oyunu oldu. Dördilliyin ən böyük futbol yarışının final qarşılaşmasında planetin ən güclüsü yalnız əlavə vaxtın sonlarında bəlli oldu. Andres İnyestanın final fitinə 3 dəqiqə qalmış vurduğu qol son Avropa çempionlarının təkcə qitədə deyil, dünyada da hamıdan güclü olduğunu sübut etdi.

32 illik fasilədən sonra finala çıxan hollandlar üçüncü cəhddə qələbə qazanmağa çalışsalar da, bunu bacarmadılar. Həm seçmə, həm də final mərhələsinin buna qədərki oyunlarında 100 faizli nəticə göstərən hollandiyalılar 1974 və 1978-ci illərdə olduğu kimi, yenə gümüş mükafatla kifayətləndilər.

Hollandlardan fərqli olaraq ispanlar ilk dəfəydi finala çıxırdılar. Son Avropa çempionları iki il əvvəl olduğu kimi, yenə qızıl medallara "susamışdılar" ki, bu da nəticədə öz əksini tapdı. Visente del Boskenin komandası mundiallar tarixinə 8-ci çempion kimi düşdü.