Kinorejissor Rasim Ocaqovun nadir fotosu aşkarlanıb

Belarusdan Azərbaycan Dövlət Film Fonduna azərbaycanlı kinorejissor Rasim Ocaqovun çox nadir fotosu daxil olub. Fondun rəhbəri Cəmil Quliyevin APA-ya bildirdiyinə görə, foto Rasim Ocaqovla Kinematoqrafiya İnstitutunda birgə təhsil almış bir şəxsin oğlu tərəfindən verilib. Bu foto 50-ci illərin əvvəllərində çəkilib. Cəmil Quliyev onu da bildirib ki, Dövlət Film Fondu Azərbaycan Kinosu Günü ilə bağlı avqustun 2-də Muzey Mərkəzində nəzərdə tutulan plakat sərgisində nümayiş olunmaq üçün Rasim Ocaqovun filmlərinin plakatlarını bərpa edib. Bu plakatların bəziləri Rusiyadan gətirilib.

Niderland "Eurovision-2011" təmsilçisini indidən müəyyənləşdirdi Gələn ilin mayında Almaniyada "Eurovision- 2011" mahnı müsabiqəsinin ilk təmsilçisi açıqlanıb. APA-nın müsabiqənin rəsmi saytına istinadən yaydığı məlumata görə, təmsilçisini seçən ilk ölkə Niderlanddır. Bu ölkəni "Eurovision-2011" müsabiqəsində "3 Ys" qrupu təmsil edəcək. Qrup üçün ilin sonunadək beş mahnı yazılacaq. İlin sonunda həmin mahnılar arasından birinin seçilməsi üçün milli festival nəzərdə tutulur. Osloda keçirilən 55-ci "Eurovision" müsabiqəsində Niderlandı təmsil edən ifaçının zəif çıxışı və finala çıxa bilmədiyi səbəbindən bu il ölkə daha güclü təmsilçi seçmək qərarına gəlib. Qeyd edək ki, "3 Ys" qrupu 2002-ci ildən fəaliyyət göstərir, peşəkar səhnəyə isə 2007-ci ildə "Watermensen" albomu ilə çıxıb. Qrup üç üzvdən - Yan Dulles, Yaar Kvakman və Yaar de Vayttdan ibarətdir.

"Kabusun gözü ilə" filminin premyerası keçiriləcək

Heydər Əliyev Sarayında 2 avqust - Milli Kino Günü münasibətilə mərasim keçiriləcək. Mədəniyyət və Turizm Nazirliyi kinematoqrafiya şöbəsindən APA-ya verilən xəbərə görə, həmin gün Rüstəm İbrahimbəyovun "Kabusun gözü ilə" filminin premyerası təşkil olunacaq. Azərbaycan və Fransanın ilk birgə layihəsi olan film bu yaxınlarda Parisdə təqdim edilmişdi. Baş rolları Mələk Abbaszadə, Şükufə Yusifova, Fatimə İbrahimbəyova, Tofiq Mirzəyev və fransız Rişar Marten ifa edirlər.

Rüstəm İbrahimbəyov "Kabusun gözü ilə" filminin rejissoru və ssenari müəllifidir. Filmdə fransız və azərbaycanlı gəncin məhəbbətindən danışılır. Çəkilişlər Bakı ilə yanaşı, Fransada da aparılıb. Premyera Heydər Əliyev Sarayının foyesində filmin çəkiliş meydançasından foto-sərginin nümayişi ilə başlanacaq.

Şabranda sərgi-seminar

Mədəniyyət və Turizm Nazirliyinin təşəbbüsü ilə Şabran şəhərində həvəskar rəssamların və xalq tətbiqi sənəti ustalarının əsərlərindən ibarət sərgi-seminar keçirilib. APA-nın Şimal bürosunun xəbərinə görə, sərgidə Xızı, Siyəzən, Şabran, Xaçmaz, Quba və Qusar rayonlarından olan rəssam və tətbiqi sənət ustalarının 300-dən çox əl işi nümayiş olunub. Əsas məqsəd - xalq yaradıcılığının inkişaf etdirilməsi idi. Qaliblər Mədəniyyət və Turizm Nazirliyinin fəxri fərmanları ilə təltif olunub. Zona sərgisinin qalibləri 2010-cu ilin sonlarında Bakı şəhərində respublika baxış sərgisində iştirak edəcəklər.

Həyatda olmayan 100-dən çox aşıq bir fotoalbomda Azərbaycan Aşıqlar Birliyi İdarə Heyəti yeni layihə üzərində işləyir. Söhbət bu gün həyatda olmayan 100-dən çox aşığa həsr olunmuş fotoalbom nəşr etməkdən gedir. Bu layihə prezident yanında Qeyri-Hökumət Təşkilatlarına Dövlət Dəstəyi Şurasının vəsaiti ilə həyata keçirilir. Azərbaycan aşıqlarının XX əsrin əvvəllərindən başlayaraq qurultaylarda və aşıqların iştirak etdikləri müxtəlif dövlət mərasimlərində çəkilmiş fotoşəkilləri kitabda əksini tapacaq. Fotoalbom bu ilin sentyabrında nəşr ediləcəkdir (APA).