Mirzə Fətəli Axundov adına Milli Kitabxana Dünya elektron kitabxanasında təmsil olunmaq hüququ qazanıb. Kitabxanadan verilən məlumata görə, Dünya elektron kitabxanası ideyası 2009-cu ildə yaranıb. Bu haqda təklif kitabxanaçıların beynəlxalq toplantısında ABŞ-ın Konqres, Misirin İsgəndəriyyə və Braziliyanın milli kitabxanası tərəfindən irəli sürülüb:
"İyun ayında Vaşinqtonda layihənin təqdimat mərasimi keçirilib. 64 ölkə ilə yanaşı Azərbaycan da sözügedən kitabxanada təmsil olunmaq hüququ qazanıb. Bunun nəticəsində dünya oxucuları Azərbaycan həqiqətləri, ölkəmizin tarixi, mədəniyyəti, coğrafiyası, iqtisadiyyatı və digər sahələri haqqında istənilən məlumatı əldə edə biləcəklər. Məlumatlar dünya elektron kitabxanasında 7 dildə yerləşdiriləcək".
Xəbərdə bildirilir ki, hazırda Milli Kitabxanada elektron resursların yaradılma şöbəsi kitabxanaya daxil olan yeni materiallar, oxucular tərəfindən daha çox tələb olunan ədəbiyyatın siyahısı əsasında iş aparır.
Azərbaycan milli mətbuatının analitik-elektron məlumat bazası da yaradılır. Köhnə qəzet və jurnalların elektron versiyası hazırlanır. Artıq "Əkinçi" ,"Sədayi haqq" qəzetlərinin, "Füyuzat" və "Babayi əmir" jurnallarının elektron versiyaları tam hazırdır. Milli Kitabxananın Elektron İnformasiya xidməti və kitabxanalar arası abonement şöbəsində isə 1993-2010-cu illərdə çap olunan bütün ədəbiyyat nümunələri kataloqlarda yerləşdirilib.
|
