İyulun 25-dən avqustun 5-dək Qəbələdə pianoçuların II Beynəlxalq Festivalı keçiriləcək. Təşkilat komitəsindən verilən xəbərə görə, ötənilki festivaldan fərqli olaraq, bu il festival çərçivəsində müsabiqə təşkil olunmayacaq. Festivalda dünya şöhrətli musiqiçi, cazmen Al Cero konsert proqramı ilə çıxış edəcək. Artıq festivalın proqramı hazırlanıb. Bir dəfə Bakı Caz Festivalında iştirak edən dünya şöhrətli sima Al Ceronun budəfəki gəlişi - Bakıya ikinci səfəridir.
Xəbərdə qeyd olunur ki, onun Qəbələ festivalı çərçivəsində konserti iyulun 27-də olacaq. Festivalda London Kral Orkestrinin ifasında görkəmli bəstəkarlar - Üzeyir Hacıbəyli, Müslüm Maqomayev, Fikrət Əmirov, Tofiq Quliyev və Fərhad Bədəlbəylinin musiqiləri səslənəcək.
Arayış: iyulun 30-da festivalın təntənəli bağlanış mərasimidir. Festival çərçivəsində iyunun 25-də xalq artisti Fərhad Bədəlbəyli və əməkdar artist Murad Adıgözəlzadənin birgə konserti, eləcə də məşhur Rusiya pianoçusu Boris Berezovskinin konserti də nəzərdə tutulur. Festival Heydər Əliyev Fondunun dəstəyi, Mədəniyyət və Turizm Nazirliyi və Azərbaycan Musiqi Xadimləri İttifaqının təşkilatçılığı ilə keçirilir.
|
