Bakıda Rusiya Federasiyasında qeyd olunan Ailə, Məhəbbət və Vəfa Günü ilə bağlı tədbir keçirilib. APA-nın məlumatına görə, tədbir Rusiyanın Azərbaycan səfirliyinin dəstəyi ilə Rusiya İnformasiya Mədəniyyət Mərkəzi tərəfindən keçirilib. Mərkəzin direktoru Ənvər Şeyxov deyib ki, dünyanın 72 ölkəsində qeyd olunan bu bayramın məqsədi cəmiyyətin diqqətini ailə problemlərinə yönəltmək, yaxşı ənənələri dirçəltməkdir.
Bakı və Xəzəryanı yepiskop Aleksandr ata ailələrin dağılmasını cəmiyyətdə baş verən ən dəhşətli hadisə adlandırıb. Aleksandr bu günün tarixi barədə danışaraq bildirib ki, bu bayram knyaz Pyotr və knyaginya Fevroniyanın şərəfinə keçirilir. Adi ailədən olan Fevroniya ilə evləndiyinə görə knyazlıqdan imtina etməyə məcbur olan Pyotr, sonradan xalqın xahişi ilə yenidən knyazlığına qayıdır, qocaldıqdan sonra onlar eyni gündə vəfat edirlər. Yepiskop qeyd edib ki, onların sevgi və vəfaları bütün ailələr və sevənlər üçün nümunə olmalıdır.
Rusiyanın Azərbaycandakı səfirinin xanımı Olqa Doroxina, millət vəkili, Azərbaycanın Rus İcmasının rəhbəri Mixail Zabelin və digər şəxslərin qatıldığı tədbirdə 25 ildən artıq nikahda olan bir neçə ailəyə "Məhəbbət və vəfaya görə" medalı təqdim edilib.
|
