Avropa İnsan Hüquqları Məhkəməsi Azərbaycana qarşı daha iki iş üzrə qərarını açıqlayıb. Hüquq Maarifçiliyi Cəmiyyətindən verilən bilgiyə görə, qeyd olunan işlərin ərizəçilərin mülkiyyətində olan mənzillərin işğal altındakı bölgələrdən olan məcburi köçkünlər tərəfindən tutulması ilə bağlıdır.
Birinci iş üzrə Simuzər Hacıyeva, Tatyana Tokareva, Aslan Hüseynov və Gülər Əliyeva olub. Onlar şikayətlərinin ölkədaxili məhkəmələrdə təmin edilməsinə və məcburi köçkünlərin mənzillərindən çıxarılması barədə qərar verilməsinə baxmayaraq, qanuni qüvvəyə minmiş məhkəmə qərarlarının hələ də icra olunmamasından şikayət ediblər.
Ərizəçilər Asif İsgəndərov, Vasif İsmayılov, Mirtəranə Kərimova, Səmid Kərimov və Sədaqət Əhmədova da bənzər şikayətlə müraciət etmişdilər.
Avropa Məhkəməsi bütün işlər üzrə vurulmuş maddi ziyana görə Azərbaycan hökumətinin şikayətçilərə kompensasiya ödəməli olduğu barədə qərar çıxarıb.
Avropa Məhkəməsi həmçinin dövlətin bu qərarları 3 ay ərzində yerinə yetirməli, ölkədaxili məhkəmələrin isə qərarların icrasını təmin etməli olduğu barədə hökm çıxarıb.
|
