Cənubi Qafqaz dəyişkənliyi və qeyri-sabitliyi ilə səciyyələnən region olaraq qalmaqdadır və beynəlxalq ictimaiyyət bu regionda, xüsusən münaqişələrin nizamlanmasında, demokratik islahatların həyata keçirilməsində iştirak etməlidir. Bu barədə Avropa Birliyinin Cənubi Qafqaz bölgəsi üzrə xüsusi nümayəndəsi Piter Semnebi iyulun 8-də Vyanada ATƏT Daimi Şurasının iclasında çıxış edərkən bildirib.
"Beynəlxalq ictimaiyyətin bu bölgəyə tamamilə cəlb edilməsinə ciddi zərurət var", - deyə o bildirib.
"Demokratik islahatların həyata keçirilməsi üzrə səylər yalnız beynəlxalq ictimaiyyət səylərini birləşdirdiyi halda uğurlu ola bilər. Bu zaman Avropa Birliyinin tərəfdarı kimi ATƏT-in rolu xüsusilə əhəmiyyətlidir", - deyə Semnebi qeyd edib.
O bildirib ki, bölgədə münaqişələrin həlli Avropa Birliyi üçün prioritet olaraq qalır. "Bu münaqişələr region üçün xüsusi təhlükədir, belə ki, status-kvo qeyri-sabit olaraq qalır və gərginlik yaranması təhlükəsi qalmaqdadır, Gürcüstanda 8 avqust 2008-ci il hadisələri bunu təsdiq etdi. Qarabağ münaqişəsi xüsusi narahatlıq doğurur. Təmas xətti boyunca müntəzəm olaraq ölümlə nəticələnən insidentlər baş verir", - deyə o vurğulayıb.
Semnebinin sözlərinə görə, bu münaqişələr Avropa Birliyini şərq qonşularında siyasi və iqtisadi islahatlar həyata keçirmək səylərinə də mane olur.
|
