Türkiyədə mahnıları məşhur sənətçilər tərəfindən səsləndirilən bəstəçi Aslızen Yentər xalq artisti Aygün Kazımovaya yeni bəstəsini hədiyyə edib. Bu barədə "Ayna" qəzetinə müğənni özü danışaraq bildirib ki, mahnı tezliklə dinləyici kütləsinə təqdim ediləcək. Bundan başqa, müğənni daha bir türk mahnısı oxuyub.
"Əslində bu, artıq ifa olunmuş mahnıdır. Mən bunu sonuncu Livan səfərində olarkən eşitdim və çox bəyəndim. Açığını deyim, ifaçının kim olduğunu bu günə qədər də bilmirəm. Amma mahnı məni tutdu. Səsyazmanı özümlə Bakıya gətirdim və mahnının sözlərini azərbaycanlaşdırdım. "Sevgilim" adlı mahnı bu həftədən dinləniləcək".
Aygün xanım istirahət proqramını da bir qədər yüngülləşdirib. Qeyd etdi ki, son günlər vaxtını əsasən səsyazma studiyasında keçirir.
"Qısa zamanda mənim 3 yeni mahnım yazılıb. Daha 2-sini isə yaxın günlərdə tamamlayacam. Mahnıların sürətlə yazılmasına səbəb artıq gecikən albomu təqdim etməkdir. Bu səbəbdən də qarşıdakı zamanımı daha çox toplunun mahnılarının yazılışına ayıracam", - deyə xalq artisti bildirdi.
Sənətçi bu və digər yaradıcılıq işlərinin çoxluğu səbəbindən ATV telekanalındakı "Xeyir ola" verilişində aparıcı kimi görünmədiyini bildirdi.
|
