Əmək və Əhalinin Sosial Müdafiəsi Nazirliyi bu il ölkədə 45 min 74 ailəyə ünvanlı sosial yardım təyin edib. Nazirliyin Yoxsulluq problemləri və sosial yardım şöbəsinin müdiri Natiq Qasımov bildirib ki, hazırda Azərbaycanda 132 min 945 ailə ünvanlı sosial yardım alır. Onların 41 min 206-na yardım ilk dəfə, 91 min 739-na təkrar təyin edilib. Bir ailə üzvünə düşən orta aylıq yardımın məbləği 24,91 manat, bir ailəyə düşən orta aylıq yardımın məbləği isə 112,98 manat təşkil edir.
Natiq Qasımov deyib ki, yardım alan 54 min 854 ailədə 3 və daha çox uşaq var. Yardım alanların 202-si qəyyumluq (himayəçi) təyin edilmiş, 34-ü şəhid, 463-ü müharibə əlili, 105-i digər səbəbdən əlil olan, 9 min 66-sı məcburi köçkün, 242-si cəzaçəkmə müəssisəsindən azad edilmiş şəxslərin ailələridir. Ümumilikdə yardım alanların 108 min 277 nəfəri dövlətdən ilk dəfə yardım alır.
Natiq Qasımovun sözlərinə görə, 2009-cu ildə ünvanlı sosial yardım təyin olunmuş 144 min 844 ailədən 87 min 871-i hələ də yardım almaqda davam edir. Yardım alan ailələrdən 94,9%-i vəsaiti plastik kartla alır.
|
