Nazirlər Kabineti "Əhalinin sıx toplaşdığı yerlərdə və obyektlərdə videonəzarət sistemlərinin yaradılması barədə" qərar qəbul edib. "Turan"ın yaydığı məlumatına görə, Daxili İşlər Nazirliyinin videonəzarət sistemləri bir çox yerdə quraşdırılacaq.
Belə ki, kameralar əhalinin sıx toplaşdığı yerlərdə, o cümlədən parklarda, xiyabanlarda, meydanlarda, küçə və prospektlərdə, yeraltı keçidlərdə, stadionlarda və idman arenalarında, böyük ticarət və əyləncə mərkəzlərində, mehmanxanaların yaxınlığında, məscidlərin, kilsələrin, sinaqoqların, ziyarətgahların və digər kütləvi ibadət yerlərinin bilavasitə yaxınlığında quraşdırılacaq.
Kameralar nəqliyyat infrastrukturlarında, yerli və ölkə əhəmiyyətli yollarda və avtomagistrallarda, yol ötürücülərində və körpülərdə, avtomobil və dəmiryol vağzallarında, hava və dəniz limanlarında, dəmiryol və metro stansiyalarında, platformalarında, avtomobil, eləcə də sərnişin daşıyan nəqliyyat vasitələrinin park və dayanacaqlarında, sərnişin daşımalarında istifadə edilən nəqliyyat vasitələrində, eləcə də icra, qanunvericilik və məhkəmə hakimiyyəti orqanlarının inzibati binalarının ətrafında da quraşdırılacaq.
Bundan başqa, həyat təminatlı mühüm və strateji əhəmiyyətli dövlət obyektlərinin yaxınlığında, mülkiyyət növündən asılı olmayaraq, bank və kredit təşkilatlarının ətrafında, Azərbaycanda fəaliyyət göstərən xarici ölkələrin diplomatik nümayəndəliklərinin və konsulluqlarının, beynəlxalq təşkilatların nümayəndəliklərinin binalarının ətrafında, təhsil müəssisələrinin yaxınlığında və bütün taksofon aparatlarının bilavasitə yaxınlığında quraşdırılacaq.я
Hökumət atılmış addımı təhlükəsizlik tədbirlərinin təkmilləşdirilməsi istiqamətində atılmış ciddi addım hesab etsə də, bu tədbirlərin insan hüquq və azadlıqlarını məhdudlaşdıran tədbir olduğunu düşünənlər də var.
|
