"Azadlıq" bloku bu gün saat 17:00-a yaxın Bakı meriyasının qarşısında etiraz aksiyası keçirməyi planlaşdırır. Aksiya toplaşma azadlığının təmin olunması və demokratik seçkilər tələbilə keçiriləcək.
AXCP sədrinin müavini Fuad Qəhrəmanlı "Turan"a bildirib ki, "Azadlıq" bloku həmçinin Qarabağla bağlı təslimçi sülhü rədd edir. "Bu sülhün şərtləri ATƏT Minsk Qrupunun həmsədr ölkələrinin prezidentlərinin bəyanatında əksini tapıb". Bu bəyanat Qarabağın Azərbaycandan qoparılmasına yönələn referendumun keçirilməsini nəzərdə tutur", - deyə Qəhrəmanlı deyib.
Onun sözlərinə görə, meriya aksiyanın keçirilməsi barədə xəbərdarlığa hələlik cavab verməyib. Lakin şəhər administrasiyasının cavabından asılı olmayaraq, aksiya keçiriləcək.
Digər etiraz aksiyasını isə şənbə günü saat 17:00-da Müsavat Partiyası keçirəcək. Eyni tələblərlə keçiriləcək aksiya Hüseyn Cavid parkında olacaq. Bu barədə partiyanın mərkəzi aparatının rəhbəri Arif Hacılı məlumat verib. Meriya Müsavat Partiyasına mitinqin keçirilməsi üçün şəhər kənarında üç yer təklif edib. Lakin partiya aksiyanı Hüseyn Cavid parkında keçirmək niyyətindədir. Bu aksiyada da "Azadlıq" blokunun səsləndirəcəyi şüarların dilə gətirilməsi planlaşdırılır.
|
