Ölkə başçısının sərəncamına əsasən, olimpiya çempionu olan və ya nüfuzlu müsabiqələrdə birincilik qazanan iştirakçılara ali məktəbə birbaşa daxil olmaq şansı verilir. Xatırladaq ki, "Eurovosion"a namizəd olan Səfurə Əlizadə də belə bir şansı qazanmaq niyyətində idi. Çünki bu il orta məktəb məzunu olan təmsilçi sənədlərini Mədəniyyət və İncəsənət Universitetinə verib. Amma müsabiqədə 5-ci yerə çıxdığından ali məktəbə birbaşa qəbul olmaq imkanı sıfıra enib. Yəni sənətçi ali məktəbin tələbəsi adını qazanması üçün bu ay keçiriləcək imtahanlarda iştirak etməlidir.
Xatırladaq ki, Mədəniyyət və İncəsənət Universitetində 1 yox, 3 imtahan mərhələsi var. Birinci seçilən peşə üzrə qabiliyyət, ikinci musiqi nəzəriyyəsi, üçüncü isə test imtahanıdır. Lakin xəbər verdiyimiz kimi, Səfurə promo-turları üçün hazırda İsveçdədir və onun Bakıya nə vaxt dönəcəyi bəlli deyil. O, bir müddət İsveçdə məşqlər edəcək və gələn aydan onun bir çox ölkələrə turnesi başlayacaq. Onun hər üç imtahanda iştirak edib-etməyəcəyi isə sual altındadır. Məsələyə aydınlıq gətirən Səfurə Əlizadə bildirdi ki, imtahanların hər üçündə iştirak üçün lazımi gündə Bakıya dönəcək:
"Əgər mən "Eurovision" kimi mötəbər yarışmada təmsil olunub, irəli sıralara çıxmışamsa, qabiliyyət imtahanından keçmək bir o qədər çətin olmaz. Bunu yəqin imtahanda əyləşən komissiya üzvləri də nəzərə alarlar. Musiqi nəzəriyyəsindən də savadım qənaətbəxşdir. Çünki mən notu bilirəm və saksafonda ifanı bacarıram. Qaldı test imtahanına, musiqiçilər üçün yüksək bal tələb olunmur deyə, bu ərəfələrdə hazırlaşmağa ehtiyac görmürəm. Həm də orta məktəbdə aldığım savada güvənərək, hətta yüksək bal tələb edən digər ali məktəb imtahanlarından da keçə biləcəyimə əminəm", - deyən Səfurə Əlizadə Mədəniyyət və İncəsənət Universitetinin estrada fakültəsində təhsil almaq arzusunda olduğunu bildirdi. Daxil olduğu təqdirdə isə müəllim seçimi etməyəcək. Yəni kimin sinfinə düşsə, orada da musiqi təhsilini ali pilləyə qaldırmağa çalışacaq.
"Mən bu günə qədər Vaqif Gərayzadə, Mübariz Tağıyev və bir sıra sənətkarlardan dərs almışam. Onlar məni ali məktəb səviyyəsində savadlandırıblar. Eyni zamanda, xaricdə olduğum müddətdə peşəkar musiqiçilərdən bəhrələnmişəm. Artıq mən sıfırdan başlamağa ehtiyac görmürəm", - deyə S.Əlizadə söylədi.
|
