Bu günlərdə paytaxt restoranlarının birində Hüseyn Dəryanın 35 yaşı qeyd edilib. Reperin həyat yoldaşı Sona xanım fanatları ilə birlikdə əvvəlcədən ona ad günü sürprizi hazırlayıb və yubiley sürprizi baş tutub. Sona xanımın qəzetimizə bildirdiyinə görə, gecəyə bir neçə saat qalmış Hüseyn Dəryaya fanatlarından biri telefon açaraq "Flaminqo" restoranında toya dəvət etdiyini bildirib. Yubiley günündə iş başında olmağa qərar verən reper həmin məkana yollanıb və başqa mənzərənin şahidi olub. O, atəşfəşanlıq və ad gününü tərənnüm edən mahnının sədaları altında qarşılanıb. Məsələdən agah olandan sonra yubiley gecə saatlarına qədər davam edib.

"Ad gününə Hüseynin həmkarlarından daha çox, yaxın dostu olan müğənni Mehri, prodüser Ronald, teleaparıcı Samir və başqalarını dəvət etmişdik. İstədik ki, onun ətrafında ən sevimli insanlar olsunlar", - deyə reperin həyat yoldaşı bildirdi.

Sona xanımın sözlərinə görə, gecədə onun üçün də sürpriz olub. Belə ki, ailənin tanıdığı hacılardan biri Hüseynə ailəsi ilə birlikdə Həccə getmək imkanı yaratdığını deyib. Sona xanım ailənin maddi dəstəyi hesabına sentyabrda Hüseynlə birlikdə Həcc ziyarətində olacağını bildirdi.