"Avro-2" standartının tətbiqi ilə bundan sonra 2006-cı ildən əvvəl istehsal edilmiş Rusiya avtomobilləri ölkəyə gətirilə bilməz. Standartlaşdırma, Meterologiya və Patent üzrə Dövlət Komitəsinin şöbə müdiri Sabiq Abdullayev mətbuata bildirib ki, artıq ölkə ərazisinə buraxılacaq avtomobillərin siyahısı da dəqiqləşib.
Normativ sənədlərə əsasən, buraxılış ili 2006-cı ildən köhnə olan Rusiya maşınları ölkə ərazisinə buraxılmayacaq. Avropa avtomobilləri üçün isə 1997-ci il məhdudiyyət ili kimi müəyyənləşdirilib. Şöbə müdiri deyib ki, bu tarixlər istehsalçı ölkələrin "Avro-2" standartlarına keçidi ilə bağlıdır. Belə ki, Avropa Birliyində "Avro-2" standartlarına 1997-ci, Rusiyada isə 2006-cı ildən keçirilib. Sabiq Abdullayevin sözlərinə görə, ölkənin neftayırma zavodlarında istehsal olunan benzin və dizel yanacağı yeni standartlara uyğundur.
Dövlət Gömrük Komitəsindən verilən xəbərə görə, artıq yeni qaydaların tətbiqinə başlanılıb.
|
