"Qarabağ" avrokuboklara darmadağınla başladı

Ötən gün Çempionlar Liqası və Avropa Liqası turnirləri çərçivəsində keçirilən ilk oyunlarla avrokubok yarışlarına start verildi. Azərbaycanı qitənin ikinci dərəcəli qitə klub turnirində təmsil edən 3 klubdan ikisi mübarizəyə başlayıb. "Qarabağ" və "Xəzər-Lənkəran" klubları Avropa Liqasının birinci təsnifat mərhələsində ilk oyunlarını keçiriblər. Komandaların hər ikisi oyunlarını əlverişli hesabla başa vurublar.

Ağdamı təmsil edən "Qarabağ" Tofiq Bəhramov adına Respublika stadionunda Makedoniyanın "Metallurq" klubunu qəbul edib. Cari mövsümdə Unibank Premyer Liqasının bürünc medallarını qazanaraq bu yarışda iştirak hüququ əldə etmiş "Qarabağ" rəqibini 4:1 hesabı ilə darmadağın edib.

Matçda ilk qolu 25-ci dəqiqədə 11 metrlik cərimə zərbəsindən Rəşad Sadıqov vurub. Əfran İsmayılovun 45-ci dəqiqədə vurduğu qoldan sonra "Qarabağ" fasiləyə 2:0 üstünlüklə yollanıb. 51-ci dəqiqədə növbəti kobudluğa görə Admir Telinin meydançadan qovulmasından sonra komandamız azlıqda qalıb. Buna baxmayaraq, 84-cü dəqiqədə və ikinci hissəyə əlavə edilmiş vaxtda Emin İmaməliyevin və Georgi Adamiyanın qolları "Qarabağ"ı hesabda 4:0 önə çıxarıb. Qarşılaşmanın sonuncu dəqiqəsində isə "Metallurq" vurulan qollardan birinin əvəzinı çıxa bilib.

"Qarabağ"dan fərqli olaraq ilk sınağını doğma meydançada deyil, səfərdə keçirən "Xəzər-Lənkəran" Moldovanın "Olimpiya" klubu ilə qarşılaşıb. Kişinyovda baş tutan matç Ağasəlim Mircavadovun komandası üçün avrokuboklarda 7-ci olub. İndiyədək qitə arenasına çıxmayan Belts təmsilçisi ilə görüşdə Lənkəran komandası bu xoşbəxt rəqəmin həqiqətən düşərli olduğunu sübut edərək ilk səfər xalını qazanıb - 0:0.

"Qarabağ" və "Xəzər-Lənkəran" cavab matçlarını bir həftədən sonra keçirəcəklər. Qurban Qurbanovun başçılıq etdiyi "Qarabağ" Skopyedə, "Xəzər-Lənkəran" isə Lənkəranda rəqiblə üz-üzə gələcək.