Azərbaycanın işğal altında olan Dağlıq Qarabağ bölgəsinin erməni əhalisinin ehtiyaclarını aradan qaldırmaq üçün İran tərəfindən onlara xeyli kənd təsərrüfatı texnikası verilib. Ermənilər bunu çox vacib "siyasi addım" adlandırırlar ("Armeniya tudey").
"Sardarapat" adlı təşəbbüs qrupundan bildirilir ki, Tehran hakimiyyəti tərəfindən uyğun məsələ ilə bağlı məktub Ermənistana deyil, məhz Qarabağdakı erməni icmasına ünvanlanıb (erməni mənbələr buranı "Dağlıq Qarabağ Respublikası" kimi təqdim edirlər). Xatırladaq ki, bu qrupun əsas üzvləri İran erməniləridir. İrandan Qarabağ ermənilərinə göndərilən məktubda taxılyığan kombayn və bu sahədə istifadə olunan başqa texnika ilə bağlı təqdimat var.
Bundan başqa, mənbənin məlumatında bildirilib ki, "Sardarapat" üzvlərinin xəbərlərindən bəlli olur ki, İran rəsmiləri Qarabağ separatçılarının rəhbərləri ilə görüşüb gələcək əməkdaşlığın müzakirəsini önəmli sayırlar.
"Dağlıq Qarabağ Respublikasının rəhbərliyi (!?-S.S) hələlik bu təklifə münasibət bildirməyib. Stepanakertin (!?-S.S.) bu məsələyə sükutla yanaşması Yerevanın mövqeyi ilə bağlıdır. Çünki İrandan idxalat məsələsini xarici güclər yasaqlayıb və bu yolla İslam Respublikasına təzyiq edir", - deyə erməni mənbələri yazır.
Hələ bu ilin aprelində Dağlıq Qarabağdakı erməni icmasının təmsilçiləri bildirmişdi ki, İrandan 5 taxılyığan kombayn alıb gətiriblər və daha 25 kombayn alacaqlar. Bir kombaynın qiyməti isə 51 min 700 dollardır.
Təbii ki, bu alver təəccüblü görünmür. Axı onlar qardaşdırlar. Alverlərinə də təbii baxmaq lazım gəlir.
|
