Nazirlər Kabineti gənc müəllimlərə əlavə güzəştlərlə bağlı qərar qəbul edib. Qərar gənc mütəxəssislərin kənd rayonlarında yerləşən ümumtəhsil müəssisələrinə işə cəlb olunmasını və fəaliyyətinin stimullaşdırılmasını nəzərdə tutur. Onlara 3 il müddətində kommunal xidmətlərini ödəmək üçün ayda 40 manat məbləğində kompensasiya planlaşdırılır. Yerli icra hakimiyyəti orqanlarına onların yaşayış sahələrinə ehtiyaclarının ödənilməsinə, daimi məskunlaşmaq üçün torpaq sahələrinin ayrılmasına və ipoteka kreditlərinin verilməsinə köməklik göstərməsi də həvalə olunub. Hazırda Azərbaycanın rayon və kəndlərində müəllim kadrlarına böyük ehtiyac var və bu məsələni həll etmək məqsədi ilə yeni beşillik dövlət proqramı təsdiq edilib.
Təhsil naziri Misir Mərdanov mətbuata bildirib ki, artıq ucqar dağ kəndlərindəki orta məktəblərin kadr təminatı ilə bağlı tədbirlər planı hazırlanıb. Pedaqoji ixtisaslar üzrə ali təhsil diplomu olan və ucqar kəndlərdə işləmək istəyənlərə yüksək əməkhaqqı, torpaq sahəsi və ipoteka kreditləri vəd olunur. Plana əsasən, dövlət sifarişi əsasında ucqar dağ kəndlərindəki məktəblərdə çalışacaq müəllimlərə yaşadıqları yerdən məktəbə gedib-gəlmək üçün nəqliyyat xərcləri də ödəniləcək. Yaşayış şəraitini təmin etmək üçün isə onlar işləyəcəyi müəssisədə əməkhaqqının 2 misli miqdarında birdəfəlik yardım alacaq. Bundan başqa, həmin pedaqoji kadrlar kitab, dəftər və digər tədris ləvazimatları ilə də təmin ediləcək. Misir Mərdanov:
"Ümumilikdə ucqar yerlərdə kadr tələbatını ödəmək məqsədi ilə ali təhsil müəssisələrində oxuyan tələbələrin sayının artırılması nəzərdə tutulur. Eyni zamanda, ali təhsil müəssisələrində yeni maliyyələşmə mexanizminin tətbiqi ilə əlaqədar, daha çox tələbat olan istiqamətlər üzrə yeni ixtisasların açılması nəzərdə tutulub".
Ucqar kəndlərə işləməyə gedən müəllimlərlə müqavilələr imzalanacaq. Müqavilənin şərtlərinə görə, gənc mütəxəssislər kənddə ən azı 3 il pedaqoji fəaliyyətlə məşğul olmalıdırlar. Bu müddət ərzində təkcə kommunal xərcləri ödəmək üçün onlara əməkhaqqından əlavə 40 manat nəzərdə tutulub. Əgər dövlət sifarişi ilə ucqar kəndlərə göndərilən pedaqoji işçilərin iş yerləri rayon mərkəzindən 22 kilometr aralıda yerləşərsə, onun maaşı daha 70 manat artırılacaq. Mütəxəssislər 3 ildən sonra həmin kənddə qalıb işləmək istəsələr, güzəştlərə bir az da əlavələr ediləcək.
Dövlət sifarişi əsasında ucqar kəndlərin məktəblərində işləməyin daha bir üstünlüyü var. Belə ki, onlar təyinatlarını müsabiqədənkənar ala biləcəklər. Dağ kəndlərində boş müəllim yerləri barədə məlumatlar və şərtlər yaxın günlərdə Təhsil Nazirliyinin saytında yerləşdiriləcək.
|
