Prezident İlham Əliyev dünən Lənkəran və Lerik rayonlarında səfərdə olub. Bununla bağlı Lənkəranın mərkəzi küçələrində hərəkət məhdudlaşdırılıb. Prezident əvvəlcə Lənkəranın Sutəmurdov kəndində tikilmiş konserv zavodunun açılışında iştirak edib. Konserv zavodu "Gilan-Holdinq" Şirkətlər Qrupu tərəfindən inşa edilib.
Ümumi sahəsi 10 ha, tikinti sahəsi 1 ha olan obyektin tikintisinə 2008-ci ilin mayında başlanıb və işlər bu ilin martında başa çatdırılıb. Zavodun işə düşməsi ilə yerli əhali üçün yeni iş yerləri yaranacaqdır. Zavodda 300 nəfərə yaxın adam işlə təmin oluna bilər. Onlardan 200 nəfəri daimi, 100 nəfəri isə mövsümi işlə təmin ediləcək. Müəssisə saatda 30 ton məhsul qəbul etmək gücünə malikdir. Zavodda 5000 litr/saat şüşə xətti, 25 qramlıq popsion dolum xətti (hər növ cem və bal qablaşdırmaq üçün), turşu və meyvə şirəsi xətti, 1 ədəd 16 tonluq və 1 ədəd 10 tonluq buxar qazanları və 100 ton/saat sutəmizləyici filtrlər quraşdırılıb. Burada ərazisi 1000 m2, həcmi 4000 m3 və tutumu 2000 ton olan soyuducu anbar quraşdırılıb.
Soyuducu anbarda 1 ədəd (-350C), 2 ədəd (-180C) və 6 ədəd (-50C) kamera var. Dövlət başçısı İlham Əliyev daha sonra Sutəmurdov kəndində "Gilan TEA" çay fabrikinin açılışına da qatılıb. Fabrikin tikintisinə 2009-cu ilin iyun ayında başlandığı, bu ilin martında isə başa çatdırıldığı bildirilir. Tikinti sahəsi 2000 m2, ümumi sahəsi 1 ha olan fabrik saatda 2,5 ton yaşıl çay yarpağı qəbul etmək gücünə malikdir. Burada 60 nəfər işlə təmin oluna bilər.
Hər iki emal müəssisəsinin açılışından sonra ölkə başçısı Lənkəran şəhərinin mərkəzində yerləşən Heydər Əliyev Xatirə Parkına gələrək onun abidəsini ziyarət edib. Sonra prezident daha bir neçə oybektin açılışında iştirak etmək üçün Lerikə yollanmışdır.
APA-nın məlumatına görə, dövlət başçısı öncə Lerikdə Heydər Əliyevin abidəsini ziyarət edib. Dövlət başçısı Lerikdə Heydər Əliyev Mərkəzinin açılışında iştirak etdikdən sonra rayon ictimaiyyəti ilə görüşüb.
Prezident İ.Əliyev Lerik Mərkəzi Rayon Xəstəxanasında aparılmış əsaslı yenidənqurma işləri ilə də tanış olub. Məlumat verilib ki, dördmərtəbəli binanın ümumi sahəsi 2100 kvadratmetdir. 90 çarpayılıq xəstəxana müasir tibbi avadanlıqla, mərkəzləşdirilmiş havalandırma və istilik sistemləri ilə təchiz olunub. Burada 200-ə yaxın həkim və tibb personalı əhaliyə xidmət göstərəcək.
Səhiyyə ocağında poliklinika, qəbul, infeksion, terapiya, doğuş-ginekologiya, cərrahiyyə, reanimasiya və intensiv terapiya, uşaq xəstəlikləri şöbələri fəaliyyət göstərir. Burada ultrasəslə müayinə, pediatr, oftalmoloq, endoskopiya, travmatoloq və əməliyyat otaqları, ümumi və biokimyəvi laboratoriya, reanimasiya və cərrahiyyə şöbələrində 20 çarpayılıq 12 palata var.
Daha sonra rayon Mədəniyyət evində aparılmış əsaslı yenidənqurma işləri ilə tanış olan prezident abadlıq-quruculuq işlərini və turizm potensialını əks etdirən fotostendlərə baxıb.
Prezidentə məruzə edilib ki, rayonun əlverişli coğrafi məkanda yerləşməsi və yüksək turizm potensialına malik olması ilə əlaqədar son illər yeni istirahət mərkəzləri, turizm obyektləri istifadəyə verilib.
Prezident İ.Əliyev məktəblilərin əl işləri, dekorativ sənət əsərləri və rəsmlərdən ibarət sərgiyə baxıb.
Dövlət başçısı rayonda istehsal olunan kənd təsərrüfatı malları və istehsal müəssisələrinin məhsullarının sərgisinə baş çəkib. Sərgidə mineral sular, arıçılıq məhsulları, musiqi alətləri, taxtadan hazırlanan müxtəlif məişət əşyaları, mebel, Lerikin tarixini əks etdirən və rayon ərazisində aşkarlanan qədim əşyalar, xalq sənətkarlıq nümunələri, habelə qum-çınqıl və kərpic zavodlarının məhsulları nümayiş olunur. Rayonda təbii üsullarla hazırlanmış bitki mənşəli dərmanlar sərgidə maraqla qarşılanıb.
Lerik keçmişdən bəri uzunömürlülər diyarı kimi tanınırdı. Bunu əsas götürən leriklilər Uzunömürlülər Muzeyi yaratmışlar və prezident İlham Əliyev bu muzeyin rəsmi açılış mərasimində iştirak etmişdir. Prezidentə məruzə edilib ki, vaxtilə bu rayonda 500 nəfərdən çox uzunömürlü yaşayırmış. Şirəli Müslümov, Mahmud Eyvazov, Məcid Ağayev kimi uzunömürlülər tək Azərbaycanda deyil, dünyanın çox yerində tanınırdılar. Bu gün Lerikdə yaşı 100-ü keçmiş 20-dən çox sakin var. Bir sözlə, dünyada yeganə olan bir muzeydir. Diyarşünaslıq məzmunu daşıyan bu muzeyin salonlarında yaşı yüzü keçmiş neçə-neçə lerikli barədə maraqlı eksponatlar, fotoşəkillər və digər sənədlər toplanmışdır.
|
